Read Siyin Chin Job 34 Bible Online

Job 34 - Siyin Chin bible

Job 34

¹No pasalte ciim mama a, pil mama nu hi; tu in ka son sia hong ngai tavun.

³An na tep uh ciang a lim sia he nu hi, ahizong ciim kammalte na zaak uh ciang he ngawl nu hi.

⁴Hi sia eima ii khensat tu bek hi.

⁵Job in mawbanna nei bong, Pathian in kei, thumaan hong danh hi.

⁶Ama in dongh a, “Banghangin leilot in khial khi hi ci thei tu khi ziam? Kei sia thithei natu za in liam khi hi, ahihang mawna nei ngawl khi hi,” ci hi.

⁷Hi pasal pa Job bang mi khat pawpo na mu ngei uh ziam? ama in Pathian zatakna lak ngeingawl hi.

⁸Ama in misiate taw kithawl le mi mawte taw vaa kot nuamsa hi.

⁹Ama in Pathian ii deina zui tu in hanciam sia a phatna om ngei peuma bo ci hi.

¹⁰No a tel thei pasalte awng, hong ngai tavun! Vaanglianbelpa Pathian in a maan ngawl naseam tu ziam?

¹¹Ama in mite a sepna bangin tel pia a, amate tungah a kiphu a kilawm bangin vawt hi.

¹²Vaanglianbelpa Pathian in siatna vawt ngawl hi; ama in kuama tungah thumaan ngawlin seam ngeingawl hi.

¹³Pathian in a vaangletna ngualdang khat tung pan nga ziam? Ama leitung uk tu in khat po in koi ziam?

¹⁴Pathian in nuntakna husan sia la kik le,

¹⁵tuasia ciang a nungta theampo thi tu a leivui suak kik tu hi.

¹⁶Na ciim uh le tu in kei thuson hong ngai tavun.

¹⁷A thutang Pathian ningkhiin nu ziam? Ama in thumaan thu ngaimaw sa nu ziam?

¹⁸Pathian in kumpite le ngamukte sia a nginat ngawl ciang ahibuale a seksol ciangin ningkhiin hi.

¹⁹Ama in ngamukte sangah pang ngawl hi, mizawngte puavawk a, a haute maipha pia tuan ngawl hi, banghang ziam cile mi theampo ama ii bitphua sa vive hi.

²⁰Mihing khat sia zanin thakhat thu in thithei hi. Pathian in mihingte vaatvawkin amate bo hi; a thahatte zongh ol takin ama in thatlum hi.

²¹Ama in ih kalsuanna theampo encik hi.

²²Mimaw khat Pathian muna pan a seal zo tu khuazing om ngawl hi.

²³Eite pai in ama ii thukhenna ih thuak tu hun Pathian in ciangtan kul sa ngawl hi.

²⁴Ama in lampuite heam in ngualdang taw a laih natu in, thu katna, thusitna khat kul sa ngawl hi.

²⁵Banghang ziam cile ama in amate sep sia he hi, ama in zanin amate lawnthal a sucip hi.

²⁶Ama in mi theampo ii mu theina munah mi mawte daan pia hi,

²⁷banghang ziam cile amate in ama nung zui nawn ngawlin a thupiakte theampo thusim ngawl uh hi.

²⁸Amate in mizawngte sia zawthawk thu taw ausak in Pathian kosak hi, tuaciang Pathian in hu ngenin a au nate za hi.

²⁹Pathian in bangma vawt ngawl tu in a khensat hial le zong kuama in ama mawsak thei ngawl hi. Ama in a mai seal le eite ih cimaw tu hi.

³⁰Mi a neng niam Pathian selte ii amate a uk ngawl natu in minamte ii vawt thei bangma om ngawl hi.

³¹Job awng, na mawnate Pathian tungah pualaak zo ni ziam, tuaciang na maw kik ngawl natu in kamciam pia zo ni ziam?

³²Na khialnate hong lak natu in Pathian tungah ngen zo ni ziam? siatna vawt a kheal tu in na thukim zo ziam?

³³Pathian sepna sia na nial nungsang na dei bang hong vawtsak tu muangmaw thei lai ni ziam? Nangma ii khensat tu hi a, kei khensat tu hi ngawl hi; tu in na ngaisutna ko hong son ta'n.

³⁴Mihing khuangaisun thei khat pawpo in thukim tatak tu hi; tuaciang ka pauna hong za miciim khat in

³⁵Job sia tel ngawl vai taw papau a, a pauna po khiakna nei vaset zongh om ngawl hi, ci tu hi.

³⁶Job ii pauna theampo ngaisun vun; ama misia khat bangin a pau hunlam na mu tu uh hi.

³⁷Pathian a leedona taw a mawna a khialna belap hi; eite theampo ii mai ah ama in Pathian nunau hi.