Read Siyin Chin Job 36 Bible Online

Job 36 - Siyin Chin bible

Job 36

¹Na thin sausak in a, Pathian taangin ka paunate tawmvei hong ngai lai ta'n.

³Ka heakna zai hi; kei hong bitphuapa Pathian sia thutang a hina a lak tu in ka heak teng ka zangh tu hi.

⁴Nang tungah kong sawl khial bua hi; na mai ah a ciim takpi mi khat na mu hi.

⁵Pathian bangza in hat ziam! Ama in kuama nomu ngawl hi; Ama ii a tel ngawl bangma om ngawl hi.

⁶Ama in mawneite nungtasak tan ngawl a, mizawngte tungah a khaikimin vawt tawntung hi.

⁷Ama in thutangte sungsia hi; kumpite bangin amate in uksak a, a tawntungin kipatoaisak hi.

⁸Ahihang mite sia a sep a vawt hu in thikkol bul a thuak le,

⁹Pathian in amate kiphatsakna le a mawnate a lak ahi hi.

¹⁰Siatna pan a kikheal natu, a kidop natu in a sonkholte amate in ngaisak hi.

¹¹Amate in Pathian thu ni in ama atu na a seam uh le a khan tawntung thinnuam in nuamsa tu uh hi.

¹²Tuabang in a ngamta bua uh le, amate sia a tel ngawl ma in thi tu a, tuaciang lui kaantan in mithi khua zuan tu uh hi.

¹³Pathian selte sia thin uuk tawntung hi, daan a kipiak ciang zongin, huna a nga natu in thungen ngawl uh hi.

¹⁴Amate khanthi uh hi, a nuntakna uh maizumna taw bo hi.

¹⁵Ahihang Pathian in mihingte ngim thuakna tungtawnin hil a, thinngimna sia a mit kihon natu in zangh hi.

¹⁶Pathian in nang ngimna sung pan hong la khia a, tuaciang ngammuangin hong lungnuamsak a, na sabuai tungah anlim nawno hong kilui veuvo hi.

¹⁷Ahihang tu in nang, na kilawm bangin daan hong kipia hi.

¹⁸Sumnguk neaknate ii na theamsak ngawl natu ahibuale haunate ii lam hong pialsak ngawl natu in kidawm in.

¹⁹Hu ngen a auna in bangma a pha hong sua ngawl tu hi; na thatang theampo in tu in nang hong hu thei ngawl hi.

²⁰Minamte lalcip natu hun, tua zan hong thet tu ngakla heak in.

²¹Siatna sangah na kihei ngawl natu in kidawm in; tuasia pan na kikep natu in ngim thuakna hong kipuak hi.

²²Pathian ii vaangletna sia bangza in lian ci sia ciamtee in; Ama sia sya theampo sung pan a lianbel hi.

²³Kuama in Pathian munah bang seam tu ci in sawl thei ngawl hi, ahibuale siatna vawt hi ci in kuama in mawsak thei ngawl hi.

²⁴A nasep tungtaang ah ama kipok tawntung hi; nang zongh ama na pok kul tu hi.

²⁵A kuama po in ama sepsate mu uh hi; ahihang eite in ih ngal et thei bek hi.

²⁶Ama ii letna a cingin ih he thei bua hi; ahibuale ama kumte ih sim thei bua hi.

²⁷Lei pan tui la in nguamalte a suaksak sia Pathian hi.

²⁸Ama in meeikaaite panin mihing nam theampo atu nguazusak hi.

²⁹Meeikaaite koi bangin kikhiin a, ahibuale Pathian teenna van lenglet in bangbangin vanto ziam ci sia kuama in he ngawl hi.

³⁰Ama in van theampo lenglet in khualengsak a, ahihang tuipi thuknate zing veve hi.

³¹Hisia in ama ii mite a vaak zia le an tam mama a nguan zia ahi hi.

³²Ama in khualeng sia a khut taw zamh a tuaciang a tuunna mun santak khasak hi.

³³Vanto in vuipi nguapi hong pai tu taangko a, ngannote in hong pai hi ci in he uh hi.