Read Siyin Chin Job 38 Bible Online

Job 38 - Siyin Chin bible

Job 38

¹Tua zawkciang vuipi suangval sung pan TOPA in Job paupui hi.

²Na heak ngawlna le khiakna om ngawl na kammalte taw kei ciimna nong dok sia nang akua ni ziam?

³Tu in ding tang in a, kong thudokte hong zo ta'n.

⁴Simlei ka vawt lai in nang na om ziam? He mama na kisa le tua thu kei hong son ta'n.

⁵Leitung letna bangcia pha tu cisia akua in khensat ziam? Akua in a tungah pikhau kai in tee ziam? Hite theampo hong zo thei tu ni ziam?

⁶Leitung anang khuamte, bang in len ziam? Simlei ii a king suangpi sia akua in khia ziam?

⁷Tua ni vaktuung in aksite lasa khawmin, vantung mite lungdam in au uh hi.

⁸Lei sung pan tuipi a puathap lai in tua tuipi khaktan tu in akua in kongpite khak ziam?

⁹meeikaai taw tuipi a tuam le tuasia khuazing taw a tuam pa sia keima khi hi.

¹⁰Tuipi atu in ngamngi khat ka vawt a, a kongpi kikalhte nungah ka keam hi.

¹¹Keima in tuasia ii munah, “Hi ciang bek pai in, pai leet heak in! Hi sungah a thahat, na tuihualte a tawlngak kul tu hi” ka ci hi.

¹²Job awng, na khan sung theampo ah ni khat beak khua a vak tu in thu na pia ngei ziam?

¹³Leitang a zamh tu le a pummat tu, mi ngilote a bukna pan a thingkeak tu in khuavak tungah thu na pia ziam?

¹⁴Puan kithepte le tungman tungah tazeik khet sia a kilangh bangin sun nitaang in mualte le ngamkuamte kilanghsak hi.

¹⁵Sun khuavak sia mi ngilote atu taang leih a, amate ii ngongtat natu te khak hi.

¹⁶Tuipi thuknate sung cikte ah na om ngei ziam? Tuipi liante ii tawdap lei ah na vak ngei ziam?

¹⁷Khuazing na mithi khua a cing kongpite hong lak khat po a om ngei ziam?

¹⁸Simlei bangza in lian cisia ngaisutna khat pawpo na nei ziam? na he le hong zo ta'n.

¹⁹Khuavak koisung pan hong pai a, khuazing ii a kipatna naak sia bang ziam ci in na he ziam?

²⁰Tuate tungah bang tan khuala pai tu cisia na lak thei ziam? ahibuale tuate na heak kiksak thei tu ziam?

²¹Tuabang hi thei tu in kong um takpi hi, nang na khan haam mama zo a, leitung a kivawt lai in om zo na hi hang hi!

²²Vuuk le ngial ka kholna mun ah na haw ngei ziam?

²³Tuate ngim nga hun le ngal kido hunte atu in ka kinginna hi.

²⁴Ni a suatona mun ah, ahibuale nisuana vui hong vakna munah na om ngei ziam?

²⁵A kua in nguatui hong luan natu in luam to a, akua in vanto keakkiat natu in lam sialsak ziam?

²⁶A kua in kuama ten ngawlna munah nguazusak ziam?

²⁷A kua in lopa meen natu in leiko, lei dangtaakte tuibuak ziam?

²⁸Nguatui ahibuale daaitui in pa a nei ziam?

²⁹Vuuk le thuamluak ii nu akua ziam?

³⁰Tui sia suang a suaksak le tuipi maitang a khalsak sia akua ziam?

³¹Pleiades aksite na sawm khawm thei ziam? ahibuale Orion aksi a sawm khawm khaute na suut thei tu ziam?

³²Aksite hun khat zawk hun khat lam na pui thei ziam? Tuaciang Bear aksi lian le Bear aksi no tungah lam na lak thei ziam?

³³Vante a uk upadi te na he ziam, tuaciang tuate leitung ah na zanghsak thei tu ziam?

³⁴Meeikaaite tungah au in nang tui hong tuamsak nguatui a suak tu in thu na pia thei tu ziam?

³⁵Tuaciang khualeng a taang vazak tu in thupia lete tuasia nang kungah hong pai in, “Nong sawl babang hong sepsak tong” hong ci tu ziam?

³⁶Nile ngun bang hun ciang pawm tu ci sia akua in vakaangte hil ziam? ahibuale nguazuk tu hunlam akua in aklui hil ziam?

³⁷Leivuite leitangh a suaksak ngua a zuk natu in meeite simin a lumlet thei ciimna kicing sia akua in nei ziam?

³⁹Tawpite a leihawngte sungah a buk ciang a neak tu an na zonsak ziam,

⁴⁰tuaciang a ngilkial tawpi note an ngakin a kuate sungah a lup laitak, a lung na kimsak ziam?

⁴¹Va-ak ngilkialte a len kawkoai ciang, a note andu in kei hong ko in a au ciang an a vaak sia akua ziam?