Read Siyin Chin Job 39 Bible Online

Job 39 - Siyin Chin bible

Job 39

¹Sathakte bang hunin suak cisia na he ziam? Sangaite a no sua tu ngakin na en ngei ziam?

²Tuate in a no bang tanvei paai ci sia na he ziam? Tuate sua hun tu na he ziam?

³A no suak tu in lei ah a baw suk tu hun le a note leitung ngam sungah a tatpui tu hun na he ziam?

⁴A note duisung ah khangin a thahat uh hi; amate paikhia in heak kik nawn ngawl uh hi.

⁵Ngam laate akua in suatakna pia ziam? Akua in thazau in, vakzausak ziam?

⁶A inn tu in senneal ngam ka pia a tuate ci al zaangtam ah ka teangsak hi.

⁷Tuate awsana khuapite taw a kikhualana ah om uh a, kuama in zualin naseamsak thei ngawl hi.

⁸Mualte sia tuate ii kivaak natu a tatna mun hi a, tua munah a neak tu in lohing pawpo zong uh hi.

⁹Ngam khuital khat in nang na hong sepsak tu ziam? Na nganbuk sungah zan a ngiak nuam tu ziam?

¹⁰Tuate khat khaukhii in lo na thosak thei tu ziam? Ahibuale na lo sungah lei kalthapna thik ha na kaisak thei tu ziam?

¹¹A thahatna lian, na suang thei tu ziam, nang ii nasep lian a seam tu in na muangmaw ngam tu ziam?

¹²Na anlaakte hong puaksak tu le na taang cilna phual panin antangte hong kaikhopsak tu in na muangmaw ziam?

¹³Kalaoh vacim khat ii thaphil sia bangza in manlang ziam! Ahihang kalaoh vacim sia hilniang vacimlian khat bangin leang thei ngawl hi.

¹⁴Kalaoh vacim puite in a tuuite lei sa ii a lumsak tu in lei ah nusia hi.

¹⁵A tuuite sia peang khat po in siiktham thei ahibuale ngamsa khat po in tamhsak thei tu cisia phawk ngawl hi.

¹⁶Tua a tuuite ama tuui hi ngawl bang phetin ngamta in, a thasaan nate a lui thawthong a sua tu sia zongh thinbot ngawl hi.

¹⁷A mawmaw sak, ciimna a pia ngawl sia keima khi hi.

¹⁸Ahihang ama a tai ciang siphu khat le a tung to khat pawpo sia nuisan bek hi.

¹⁹Job awng, siphute thahatsak in, a ngawng mul kaai niingniangte a pia sia nangma na hi ziam?

²⁰Khaumaw bangin amate na kipeaksak ziam? tuaciang a naak thinna taw mihingte na lausak ziam?

²¹Tuate in ngamkuam sungah lawp takin lei khuat hi; a tha nei za taw ngal kisimna phual del uh hi.

²²Tuate in launa a cisia he ngawl uh hi, tuaciang namsau in heak kiksak thei ngawl hi.

²³A tung a tote ii ngalhiam kente, nging lialua in nisa sungah tee vazial hi.

²⁴Siphute patauna taw a ci liingin mai ah tai uh hi; lemle kitum ciangin ding thong thei ngawl hi.

²⁵Lemle kitum simin a naak uh thing hi; ngal kisimna mun nai a thet ma in ngal ngimnam za thei a, tuaciang tuate in ngalkapbute ii au in a thupiakte za uh hi.

²⁶Muthi khat in thangsang zuan tu in a tha a phalh ciang, a len thei natu sia nang tung pan hong sin ziam?

²⁷Muvanlai khat in mualsaang dawnte ah bu a tom nop ciang nangma thupiak tu hong ngak ziam?

²⁸Tuasia in a saangbel suangpite tungah a bu vawt a, tuaciang suanghiamte a kulh in mang hi.

²⁹Tua mun panin ama in a nai, a khuala ah bang khat po that in a neak tu a om ziam ci in encik hi.

³⁰Sathite kiimkot ah muvanlaite kikhawm a, muvanlai note in a chi dawn uh hi.