Read Siyin Chin Job 4 Bible Online

Job 4 - Siyin Chin bible

Job 4

¹Job awng, kei pau leng na thin a nawngkai tu ziam? Huthe ngawlin om thei nawn ngawl khi hi.

³Mi tam na hil zo a, tha zawngkhalte tha na pia zo hi.

⁴Khat po lutu in, toi in, tha zawmin a om ciang, na kammalte in hanthawn a, ama dingtangsak hi.

⁵Tu in na ngim nga tu hun hong tung a, a thuak zo ngawl tu dongin na thinngim leih hi.

⁶Nangma in Pathian na bia a, na nuntakzia sitbaang ngawl hi; tua ahikom kimuanna le lametna na nei tu ahi hi.

⁷Tu in ngaisun kik in. Thutang mi khat ii tuasiatna a thuak ngei khat son in.

⁸Mite in tatsiatna lo bangin tho a, ngitlona ancii poai bangin a poai ka mu hi; tu in amate in siatna le ngitlona teng anlaak bangin la uh hi.

⁹Vuipi suangval bangin Pathian thin uukna in amate susia hi.

¹⁰Mi ngilote sia tawpite bangin hawkin ngalh hi, ahihang Pathian in amate thimsak a, a hate suktansak hi.

¹¹Mat tu neak tu a nei ngawl tawpite bangin, amate thi a, a tate theampo kithethaang hi.

¹²Khatvei thu khat, aw thim taw hong theng a, dam pau mama ahikom ka za thei bua liang hi.

¹³Zan mangsia bangin tua in ka mut hong phawng hi.

¹⁴Liingin ka ngawk hi; ka pumpi bup lau in, kithing hi.

¹⁵Vuiva vahiau khat in ka maitang hong seam a, lau in ka khuasik mul suak hi.

¹⁶Tua munah a ding khat ka mu thei hi; sal kaleng zong a bang tatak ziam ka son thei bua hi. Tuasia ciang a thim dide sung pan aw khat ka za hi:

¹⁷“Pathian ii muna ah mi khat pawpo a thutang om thei tu ziam, tua ahibuale ama a bitphua pa mai ah a thiangtho om thei tu ziam?

¹⁸Pathian in a vantung naseamte muang ngawl hi; ama in a vantunglalangte ii khialna ngawngawn mu hi.

¹⁹Tungman taw kivawt a nungta khat, leivui sung pan a piang na khat pingpaleap bangin ol takin a kimetcip thei khat sia ama in muang tu in na um ziam?

²⁰Mihing khat sia zingsang in nungta tha tu a, ahihang nitak hun a thet ma in kuama heak ngawlin thi hi.

²¹Ama ii nei theampo kilaaksak a; ciimna nei ngawl lai in thi hi.”