Read Siyin Chin Job 40 Bible Online

Job 40 - Siyin Chin bible

Job 40

¹Job awng, nang in Vaanglianbelpa Pathian thato ni hi; tu in tawlnga tu ni ziam ahibuale a kam zo tu ni ziam?

³TOPA awng, a mawmawthuai kam pau khi hi. Bang kong zo thei tu ziam? Bangma dang ka son nawn buatu hi.

⁵Ka pau tu za sangin tamzaw pau zo khi hi.

⁶Tuasia ciang vuipi suangval sung panin TOPA in Job khatvei paupui kik hi.

⁷Tu in dingtang in a, kong dok thute hong zo ta'n.

⁸Kei thutang ngawl hi hong ci nuam in hanciam a — kei a khial hong tangsak a nang le nang kimaansak nuam ni ziam?

⁹Nang keima bangin hat ni ziam? Na aw keima vanto aw bangin na ngingsak thei ziam?

¹⁰Tuabang ahile na vaang neina le na kisuantaak na taw ding in; nang le nang vaangletna le minthanna puan silh in.

¹¹A kiphasakte en in; na thin uukna lak in a, amate kiniamkhiaksak in.

¹²Hi hi, amate en in a, khiasuk in; mi ngilote a dinna munah sucip in.

¹³A vekpi in lei sungah phum in; mithi khua ah heencip in.

¹⁴Tuasia ciang nang hong pok masa phit tu sia keima hi tu khi hi, nangma ma in zawna nga hi, kong ci tu hi.

¹⁵Behemoth nganhing pui sia en in; [5] ama ka bitphua a, tuaciang nangma kong bitphua hi. Ama in khuipui khat bangin lopa ne hi,

¹⁶ahizong a pumpi sungah bang thahatna om a, a sangol sungah bang vaangletna om ziam!

¹⁷A mei sia cedar thingkung bangin dingto a, a peang thangolte hat hi.

¹⁸A ngute taau bangin khoh a, a peangte thikpum bang ahi hi.

¹⁹Nganhing nungta theampo sung pan a lamdangbel ma hi! Ama a Bitphuapa bek in ama zo thei hi.

²⁰Ngamsate kimaina mualte tungah ama ii kivaak natu lopa po hi.

²¹Lingkungte nuai ah ama lumin, nawng sung pumpate kawm ah buu hi.

²²Ama sia luihui a po lingkungte le pakngiamte in a lim bealhsak hi.

²³Ama in nguntui luang vahawn sia kiita ngawl hi; ama Jordan nguntui in a maitang a the ciang om hiithiat lel hi.

²⁴Akua in a mittawsakin man thei tu ziam? Ahibuale akua in thaang sungah a naak awksak thei tu ziam?