Read Siyin Chin Job 5 Bible Online

Job 5 - Siyin Chin bible

Job 5

¹Job awng, biakpui in. Hong zo a om ziam en in. Na bel thei tu vantunglalang khat po a om ziam?

²Thin natna teng taw na thi dong na thinngim tu sia mawmawt huai hi, khiakna om ngawl ngamtatna hi.

³Ngammuang a kisa, mihing mawmawte ka mu ngei hi, ahihang a bangkuate thakhat thu in ka haamsiat hi.

⁴A tapate in ngal muanna mu zo ngeingawl a, kuama in amate hung tu in zum sungah dinpui ngawl hi.

⁵A ngilkial mite in a mawmaw sia ii lo an — ling kawm ah a po lo ante ngawngawn — neaksak tu uh hi. tuaciang a dangko mite in ama ii nei le lamh te eang tu uh hi.

⁶Siatna sia lei sungah po ngawl a, ngimna zongh lei panin po ngawl hi.

⁷A hi ngawl tatak ma hi! Mihing in ama le ama ngim kipia a, mei eakte mei sung pan a peakto bang tatak ahi hi.

⁸Nang hi leng Pathian kung tuu in, ama tungah ka thu ka sung tu hi.

⁹Ama ii nasep lian a septe ih tel zo bua a, nalamdang a laknate bo hun nei ngawl hi.

¹⁰Ama in leitang tungah nguazusak a lote tui buak hi.

¹¹Hi hi, a kiniamkhiakte a laamto le, a khuangai theampo lungdamna a pia sia Pathian hi.

¹²Ama in mihing kukalte ii ngealnate lumleesak a, miciimte zongh a tup a sawmnate sung ma ah thaangsia hi, tuabangin amate ii sepna bangma a taangtung ngawl tu in vawt hi;

¹⁴Amate suntang ngawngawnin khuazing a lei zawtin pai uh hi.

¹⁵Ahihang Pathian in mizawngte thina pan hun hi; Ama in a cimawte zawthawkna pan hun hi.

¹⁶Ama in mizawngte lametna pia a, mi ngilote thimsak hi.

¹⁷Pathian ii puua kik sia mi hampha ahi hi! Pathian in hong teih le thin uuk heak in.

¹⁸Pathian in ama liamsuate ii meimate tuamsak hi; a khut taw nang hong nasak a, a khut taw nang hong damsak hi.

¹⁹Hun khat zawk hun khat ama in nang lal theina pan hong hun tu hi;

²⁰kialpi a tun ciang ama in nang hong nungtasak tu a, tuaciang ngal sungah thina pan nang hong dal tu hi.

²¹Pathian in nang sia sonsiatna pan hong suatak tu a, lalna a tun ciang nang hong hun tu hi.

²²Nangma in ngoltolnate le ngilkialnate na nuisan tu a, tuaciang ngamsate na kiita buatu hi.

²³Na lo thawna munah suang om ngawl tu hi; ngamsate in nang hong sim ngeingawl tu hi.

²⁴Tuaciang na puanbuk sungah thinnuamin na teang tu hi; na tuute na et ciang bit takin a om na mu tu hi.

²⁵Ngan thana munah lopa teete zaa in ta tam mama na nei tu hi.

²⁶Anlaak hun dong a min mangtaang huite bangin a huai a teakin na nungta tu hi.

²⁷Job awng, hi thute koma ii khuangeipi ka sin ka heaksa uh hi. Thumaan thu ahikom tu in saang thiam in.