Read Siyin Chin Job 9 Bible Online

Job 9 - Siyin Chin bible

Job 9

¹Hi hi, tuate theampo sia ka zaak ngeisa vive hi. Ahizong, mihing khat in Pathian langpanna thu ah, bangbangin thu zo thei tu ziam?

³Bangbangin mihing khat po in Pathian nial zo tu ziam? Ama in kuama ii zo thei ngeingawl tu thu dokna tul khat, dongh thei tu hi.

⁴Pathian sia ciim peuma a, vaanglian hi; kuama in ama langpan zo ngawl hi.

⁵Ama in kidop natu thu son khol ngawlin mualpite khiin a, tuaciang a thin uukna taw tuate susia hi.

⁶Pathian in zinliingsak a, lei ngawksak hi, ama in leitung a nang khuamte thiing hi.

⁷Ama in ni a sua ngawl natu in khak thei a, tuaciang zanin aksite taangsak ngawl thei hi.

⁸Pathian ii vantungte a phalh ciang ahizong tuipi nganhing pui sia ii thibin a totcip ciang ahizong kuama in hu ngawl hi.

⁹Pathian in aksite — Solh, Siluk, Zawlzawng te le thangsang aksite van ah khai hi.

¹⁰Na lianpi ama ii septe ih tel zo bua hi, tuaciang ama ii lamdang laknate bo hun nei ngawl hi.

¹¹Pathian in hong kaantan hi, ahizong ama ka mu thei bua hi.

¹²Ama in a dei po la a, kuama in tho thei ngawl hi; kuama in, “Nang bang vawt ni ziam?” ci in dongh ngam ngawl uh hi.

¹³Pathian ii thin uukna sia thai ngeingawl hi. Ama in ama langpan tuipi nganhing pui Rahab tha a pia a ngalte ngoaicip hi.

¹⁴Tua ahikom Pathian kam ka zo natu kammalte koi bangin mu thei tu khi ziam?

¹⁵Mawbaang ngawl ka hihang ka vawt theibel sia Pathian ka thukhenpa munah hesuak nget tu ahi hi.

¹⁶Tuasia ciang ngawngawn in, ka pau tu hong oai hial le zong, ama in hong ngai tu in ka um thei bua hi.

¹⁷Ama in ahang thu om ngawl bulin kei hong nawk tu le hong liamsak tu vuipi suangvalte hong paisak hi.

¹⁸Ama in ka hu zongh hong diiksak man bua hi, ka nuntakna a sia a kha taw hong dimh hi.

¹⁹Thazaw ka suang tu ziam? Pathian tungah thazaw kisuang thei ziam? Thukhenzum ah ama then tu khi ziam? Akua in ama paisak thei tu ziam?

²⁰Mawbaang ngawlin thumaan ka hi hang ka kammalte sia a mawte ii awsua bang ka hi hi, tuaciang ka pau theampo in kei hong puanil taw kibang hi.

²¹Mawbaang ngawl khi hi, ahizong awlmaw zo nawn bong. Nuntak tu ngaisun zo ngawl khi hi, thupi ka sak om nawn ngawl hi; maw ka leang, maw bua ka leang Pathian in eite hong lalsak tu hi.

²³A maw ngawl mi khat thakhat thu in a thi ciang Pathian nui hi.

²⁴Pathian in leitung sia mi ngilote pia hi. Ama in thukhenmangte theampo mittawsak siat hi. Tuabang sia Pathian ii vawt ahibuale akua vawt ziam?

²⁵Ka ni hunte pai vahan a, khat zongh a pha om ngawl hi.

²⁶Ngunkuang manlangbel sia bangin ka nuntakna bo vazangh a, muvanlai ii bilpi khat man tu in a suktun bangin manlang hi.

²⁷Zumnui maitai in ka natnate makngil sawm leng ngim ka thuakna theampo in hong lauthawn tu in hong vil kik hi. Pathian in kei sia a maw ma in hong koi hunlam ka he hi.

²⁹Maw hong kiputsak zawk nungsang banghang awlmawk tu khi ziam?

³⁰Ka mawnate hong silthiang zo tu satpia om ngawl hi.

³¹Pathian in a kiihuai dum sungah kei hong lawn suk a, ka puansilhte ngawngawn in kei hong maizum pui hi.

³²Pathian sia mihing hile a kam zo thei khi hi; ka kihauna uh thukhen tu in zum ah pai thei tu khu hi.

³³Ahihang ko kilaklaw ah palai hong seam tu kuama om ngawl — Pathian le kei thu hong khen khawm tu kuama om ngawl hi.

³⁴Pathian awng, kei daan nong piak tawp in! A kiitakhuai na vawt te heam in!

³⁵Kei lau ngawl khi hi, pau tu khi hi, banghang ziam cile ka thinsung keima in he khi hi.