Read Siyin Chin Psalm Late 102 Bible Online

Psalm Late 102 - Siyin Chin bible

Psalm Late 102

¹TOPA awng, kong thungetna hong ngai ta'n a, hu ngen a ka auna aw hong za ta'n!

²Ngim ka nga laitakin hong nungngat heak in! Kei hong ngai ta'n a kong biapui ciangin a manlang in hong zo ta'n!

³Ka nuntakna sia meikhu bangin bo vadi hi; ka pumpi sia mei bangin kuang hi.

⁴Lopa ko bangin hong kivaat hi; an zongh ka du nawn bua hi.

⁵A ngingin ka tau hi; ka vun le ka ngu bek taw ka om hi.

⁶Keima in sennealngam sungah a om sane vacim khat bang le, a zaancip a kinusia mun sungah a om simbu khat bang ka hi hi.

⁷Khangciim in ka lum hi; innkhum tungah om vacim lungzuang khat bang ka hi hi.

⁸Nitangtum in ka ngalte in hong selno hi; kei hong nunaute in keima min tomlawna in zangh uh hi.

⁹Na thin uukna le na thinsona hu in, vut sia an in ka nei a, ka thituite sia ka tuineak taw kihel hi. Nangma in nong tawm a nong vawk hi.

¹¹Ka nuntakna in nitak niliap bang hi a, keima in lopa ko taw ka kibang hi.

¹²Ahihang TOPA awng, nangma in kumpipa na hi tawntung hi; khang theampo in nang hong phawk tu hi.

¹³Nangma in tho in Zion tungah mulkimna na nei tu hi; tua khuapi tungah hesuakna na nei tu hun hong theng zo hi! Hi sia in a kiciangtan hun hi.

¹⁴Tua khua sia kisusia zo hi napi na naseamte in it hi, tuasia zaancip zo ahitazong amate in khuangaihuai sa hi.

¹⁵Minam tuatuamte in TOPA kiita tu hi; leitung ah kumpite theampo in ama ii vaangletna kiita tu hi.

¹⁶TOPA in Zion a sakkik ciangin ama in ama ii letna pualaak tu hi.

¹⁷A kitaisan sa a mite thungetna ama in ngai tu a, za tu hi.

¹⁸Mihing a piang ngawl laite in TOPA a pok thei natu, khangkik te atu in ama sep sate lai taw khum tavun.

¹⁹TOPA in a saangna a om ama ii thiangtho mun panin hong ensuk a, ama in vantung panin simlei ensuk hi.

²⁰Ama in thongtaakte tauna za a, thi daan a kipiate suaktasak hi.

²¹Tua ahikom ama min sia Zion ah kithangsak tu a, Jerusalem ah ama kipok tu hi.

²²TOPA bia tu in minamte le kumpi ngam tuatuamte hong kikhop ciangin tuabangin kipok tu hi.

²³TOPA in ka khanmoi kimlai ma in hong thazawmsak hi; ama in ka khan hong tomsak zo hi.

²⁴Pathian awng, ka huai maa, tu in kei hong la heak in. TOPA awng, nangma in a tawntungin na nungta hi;

²⁵khuangeipi lai in nangma in leitung na bitphua a, nangma khut mama taw vantungte na vawt hi.

²⁶Amate sia bo vangeu tu a, ahihang nang sia na om lai tu hi; amate in puan bangin tul tu hi. Nangma in amate puan bangin na vawk tu a, amate a bo tu hi.

²⁷Ahihang nangma in a tawntungin na kibang a, na nuntakna a bo ngei bua hi.

²⁸Ih tate sia thin muang takin nungta tu a, nangma ii dalna sungah amate suan le paalte sia ngammuang tu uh hi.