Read Siyin Chin Psalm Late 103 Bible Online

Psalm Late 103 - Siyin Chin bible

Psalm Late 103

¹Ka thaa awng, TOPA pok in! Ka nuntakna theampo awng, ama min thiangtho pok in!

²Ka thaa awng, TOPA pok in a, ama bangza dik ziam ci sia mangil heak in.

³Ka mawna theampo ama in hong maisak a, ka natna theampo hong damsak hi.

⁴Ama in thaankuul thet natu panin hong keam a, itna le hesuakna taw thupha hong pia hi.

⁵Muvanlai bangin hatin ka moisua kik natu in ka nuntakna sia naphate taw ama in hong dimh hi.

⁶A kinengcipte panpuina taw TOPA in thukhen a, amate ii nga tuakte pia hi.

⁷Ama ii ngealnate Moses tungah ama in pualaak a, ama ii sepna liante Israel mite musak hi.

⁸TOPA in hong hesuak a hong it in, thin uuk hak a, itna kip taw kidim hi.

⁹Ama in hong teih thapaai ngawl hi; a tawntungin a thin uuk ngawl hi.

¹⁰Ama in eite taw a kiphu bangin daan hong pia ngawl a, ih mawnate le ih tat khialnate bangin hong thuk ngawl hi.

¹¹Van sia lei panin a saan za in ama a zaktate a itna sia lian mama hi.

¹²Nisuana sia nitumna pan a kikhualat za in ih mawnate sia eite sung pan tuabangza ma kikhuala in hong khiinsak hi.

¹³Pa khat in a tate tungah dik ahi bangma TOPA sia ama a zaktate tungah dik hi.

¹⁴Eite sia bang taw kivawt ci sia ama in he hi; ama in eite leivui ih hi sia phawk nginge hi.

¹⁵Eite ih hile ih nuntakna sia lopa bang ahi hi. Ngam paak khat bangin ih khang a ih palh hi;

¹⁶Tua zawkciang a tungah vui hong va a, tua paak bo in- kuama in mu kik ngawl hi.

¹⁷Ahihang TOPA a zaktate atu in ama ii itna in a tawntungin kikhomsuan a, ama phatna sia khang tawntungin kikhom hi,

¹⁸Ama thuciamna sungah a thumaante le ama thupiakte citakna taw a zuite atu in ama phatna sia khang tawntungin kikhom hi.

¹⁹TOPA in a kumpi tokhum sia vantung ah koi hi; ama in mun theampo a uk kumpipa ahi hi.

²⁰Ama thupiakte zui a, ama ci bang a ni, no, a thahat vantunglalangte awng TOPA pok vun.

²¹Ama deina bangin a ngamta no, ama naseam, vantung a om vaang nei theampo awng, TOPA pok vun!

²²TOPA pok vun, ama ukna sung mun theampo ah ama ii bitphua sate awng. TOPA pok in, ka tha awng!