Read Siyin Chin Psalm Late 104 Bible Online

Psalm Late 104 - Siyin Chin bible

Psalm Late 104

¹Ka thaa awng, TOPA pok in! TOPA ka Pathian awng, nang bangza in na lian ziam! Kumpi zaletna le minthanna,

²nangma in puan bangin na silh hi; Nangma le nangma khuavak taw na kituam hi. Vantungte tuipuan buk khat bangin na phalh hi.

³Tuaciangin na inn sia tungsang a om tuite tungah na sa hi. Meeite sia siphu ngalleang bangin na zangh a, vui ii thate tungah na to hi.

⁴Vui sia kamtaite bangin na zangh a, khualeng sia na naseamte bangin na zangh hi.

⁵Simlei sia a tawdapte ii tungah kho takin na phut a, a kikhiin ngei buatu hi.

⁶A tungah tuipi sia puantual khat bangin na koi a, tui in mualte a khum hi.

⁷Tuite na teih ciangin amate tai uh hi; na thupiakna aw hong zaak ciangin nawtai uh hi.

⁸Tua tuite sia mualte tung le leikuamte sungah luang a, na see sa mun zuan uh hi.

⁹Leitung a khuum kik nawn ngawl tu, a kaantan thei ngeingawl natu in ngamngi na omsak hi.

¹⁰Ciktuite munkuam sungah na luangsak a, ngunte mualte kilaklaw ah na luangsak hi.

¹¹Tuate in ngamsate atu tui ngasak hi; tua munah ngam laate a dangcim uh hi.

¹²A hui ah a om thingkungte tungah vacimte bu vawtin lasa uh hi.

¹³Mualte tungah van panin nguatui na puaksuk a, leitung sia na thuphate taw kidim hi.

¹⁴Khuite atu in lopa na posak a, mihingte zak tu in thingnote na posak hi, tua ahikom amate in lo ante ciing thei a,

¹⁵a lungdam natu in sapittui, a maitai natu in olive thau, a thahat natu in anluumte piangsak hi.

¹⁶Lebanon mual tungah TOPA ii a suan a neisa Cedar thingkungte in nguatui tam mama a nga uh hi.

¹⁷Tua munah vacimte in a bu vawt uh hi; hilniang vacimliante in mang taakthing tungah a bu vawt uh hi.

¹⁸Sathakte in mualdawn saangte tungah teang a, ngalhvangte in suangliangte ah buu uh hi.

¹⁹A ni a thate teptee natu in tha na bitphua hi; ni in a tum tu hun he hi.

²⁰Nangma in zan na vawt a, khuazing sungah ngamsa theampo pusuak hi.

²¹Tawpi moite in sa a vai ciang hawk uh a, Pathian ii piak an zong uh hi.

²²Ni a sua ciangin amate akua zuanin lum uh hi.

²³Tuasia ciangin mihingte in naseam tu in kuan a nitak dongin na seam suak uh hi.

²⁴TOPA awng, nangma in na tam mama na vawt zo hi! Ciimna taw tuate theampo na vawt hi! Simlei sia na bitphua nuntakna neite taw kidim hi.

²⁵A kisim zo ngawl nganhingte a lian, a no a teen khopna tuipi sia lianin zai hi.

²⁶A tungah teambawte khualhaw a, a sungah na vawtsa tuipi nganhingpui Leviathan kimai hi.

²⁷Tuate theampo in an a taangsap hun ciang a pia tu in nang hong suang hi.

²⁸Nangma in amate an na pia a, a ne uh hi; an na piak ciang amate a lungkim uh hi.

²⁹Na nungngat ciangin amate lau uh hi; a husan na laak ciangin amate thi in, amate pianna leivui ah cia kik uh hi.

³⁰Ahihang amate hu na mop ciang a kibitphua uh hi; Nangma in leitung ah nuntakna thak na pia hi.

³¹TOPA minthanna kikhomsuan tahen! Ama vawt sate tungtaang ah TOPA lungdam tahen!

³²Ama in simlei en a, leitung a liing hi; ama in mualte tham a, tuate sung pan meikhu pusuak hi.

³³Ka nuntak lai tawntung TOPA tungah la ka sa tu hi; ka nuntak laiteng ka Pathian tungah pokna la ka sa tu hi.

³⁴Ka la in ama lungkimsak tahen, banghang ziam cile ka lungdamna sia ama kung pan hong pai ahi hi.

³⁵Mawneite leitung panin kilalcipsak tahen; mihing seksolte om nawn heak hen. Ka thaa awng, TOPA pok in! TOPA pok in!