Read Siyin Chin Psalm Late 106 Bible Online

Psalm Late 106 - Siyin Chin bible

Psalm Late 106

¹TOPA pok vun! TOPA tungah lungdamko vun, banghang ziam cile ama pha hi; ama ii itna in a tawntungin kip hi.

²A sep sa na liante theampo akua in son zo tu ziam? Akua in a kicingin pok thei tu ziam?

³Ama thupiakte ni a, a tawntungin a maan in a seamte sia mihing lungdamte ahi hi.

⁴TOPA awng, na mite na hu ciangin kei hong phawk ta'n; amate na ngup ciang kei zongh hong hel ta'n.

⁵Na mihingte nopsakna hong musak ta'n a, na minam ii lungdamna, na mihingte ii lungdam angtannate hong siimsak ta'n.

⁶Ka taanghpupite ii maw bangma in ko zongh ka maw zo uh hi; kote in seksolin ka ngilo uh hi.

⁷Egypt ngam ah ka taanghpupite in Pathian ii a lamdang a sepnate tel ngawl hi; tamvei tak, a itna a lak hunte amate in mangil hi, tuaciangin San Tuipi ah amate in Vaanglianbelpa langpan uh hi.

⁸Ahihang ama in a kamciamsa bangin a vaangletna lian a lakna in amate hun hi.

⁹Ama in San Tuipi thupia a, tua tuipi kang hi; ama in a mite leiko tung tawnsak in lampui hi.

¹⁰A ensante khut sung panin amate hun hi; a ngalte khut sung panin amate suatak hi.

¹¹Ahihang a ngalte ahile tuitaa siat hi; khat zongh a taang bua hi.

¹²Tuasia ciang a mite in ama kamciamte um in pokna la a sak uh hi.

¹³Ahihang amate in ama sep sa teng mangil pai uh a, ama ii ngaisut piakna ngak ngawlin ngamta uh hi.

¹⁴Senneal sungah amate duhopna taw kidim a, Pathian ze et uh hi;

¹⁵tua ahikom amate nget teng ama in pia a, a kiitakhuai mama natna khat zongh amate sungah puak hi.

¹⁶Tua sennealngam sungah amate in Moses le TOPA ii a thiangtho naseampa Aaron a eang uh hi.

¹⁷Tuasia ciang lei kihong in, Dathan sia lei in valh a, Abiram le a innkuanpuite lei in hukcip hi;

¹⁸a nungzuite tungah meikuang paisuk a, tua mihing seksolte kaanghtum hi.

¹⁹Amate in Sinai ah khamh taw khuitalno lim khat vawtin tua milim bia uh hi;

²⁰amate in Pathian minthanna sia lopa a ne nganhing khat ii lim taw theak uh hi.

²¹Egypt ngam sungah ama ii a nasia mama sepnate taw amate a hun Pathian, amate in mangil uh hi.

²²Tua munah ama in bang a lamdang nate vawt ziam! San Tuipi ah ama in bang a lamdangsak huaite vawt ziam!

²³Pathian in a mite ka lalsak tu a ci ciangin ama ii teal a naseampa, Moses in Pathian mai ah dingin a thin uukna taw amate a lalsak ngawl natu in khaam hi.

²⁴Tua zawkciang amate in tua ngamnuam a nolh uh hi, banghang ziam cile amate in Pathian kamciam a um bua uh hi.

²⁵Amate in a tuipuan buk sungah om in phun a, TOPA aw a nangai nuam bua uh hi.

²⁶Tua ahikom amate sia sennealngam sungah a thisak natu ahizong

²⁷a suan a paalte Pathian he ngawlte kawm ah a kithethaangsak natu ahizong, ngamdang ah a thisak natu ahizong ama in a ciliap huai kidop thei natu thupia hi.

²⁸Tuaciang Peor ah Pathian ii mihingte in Baal biakna pawm uh a, nuntakna nei ngawl pathiante tungah a kipia sangaw biak piaknate ne uh hi.

²⁹Amate in a ngamtatna taw TOPA thin uukna toklosak uh a, a kiitakhuai natna khat amate sungah hong tung hi.

³⁰Ahihang Phinehas dingto in a mawte daan a piak ciang, tua pul natna thai hi.

³¹Hi thu sia ama maipha nga natu in tua hun pan kipan kiciamtee a, hong pai lai tu hun theampo sungah kiphawk tu hi.

³²Meribah ciktui ah tua mite in TOPA thin uuksak uh a, amate hu in Moses ngim nga hi.

³³Amate in Moses ii thin siasak ahikom ngaisun phot ngawlin ama pau hi.

³⁴Amate in TOPA thupiak bangin Pathian he ngawlte a that bua uh hi,

³⁵tuabang ci thada amate taw nupa in kiteang uh a, doaibiate ii ziate zui uh hi.

³⁶Pathian mite in milim bia uh a, tua in amate lalna piangsak hi.

³⁷Amate in a tapate a tanute sia Canaan milimte tungah sangaw biakpiakna in nei uh hi.

³⁸Amate in tua mawnei ngawl patangno numeinote thatlum uh a, tua kithalupnate in ngam ninsak hi.

³⁹A ngamtatna uh taw amate le amate kininsak in Pathian tungah a thumaan bua uh hi.

⁴⁰Tua ahikom TOPA sia ama mite tungah thin uuk hi; ama in thasiathuai sa hi.

⁴¹Pathian in amate sia Pathian he ngawlte ii khut sungah nusia a, a ngalte in amate uk uh hi.

⁴²Amate sia a ngalte in zothaw a, amate khutnuai theng siat uh hi.

⁴³Tamvei ma TOPA in a mite suatak ahihang, amate in TOPA langpan tu teal zaw ahikom amate sia mawna sungah a thuk zaw in taaksuk uh hi.

⁴⁴Ahizong amate ii au in a biapui ciang TOPA in za a, amate ii dongtawnate phawsak hi.

⁴⁵Amate atu in a thuciamna phawk a, ama ii itna lianpi hu in amate maisak hi.

⁴⁶Pathian in amate a vawtsia mihing theampo sungah, hesuakna thin neisak hi.

⁴⁷TOPA kote Pathian awng, hong hun ta'n, nang tungah lungdam kong ko thei natu le na min thiangtho kong pok thei natu in, minam tuatuamte sung panin, hong kaikhawm kik ta'n.

⁴⁸Israel te ii Pathian, TOPA pok vun; tu le a tawntungin ama pok vun! A kuama theampo in “Amen!” ci tahen. TOPA pok vun!