Read Siyin Chin Psalm Late 107 Bible Online

Psalm Late 107 - Siyin Chin bible

Psalm Late 107

¹“TOPA tungah lungdamko vun, banghang ziam cile ama pha hi; ama ii hong itna in kikhomsuan hi!”

²Ama hong ngup sa note theampo in hi kammalte lo kikikin TOPA pok vun. Ama in na ngalte kung panin hong suatak a,

³ngamdang pan le nisuana, nitumna, sak le thang panin no hong ciapui kik hi.

⁴Pawlkhatte in senneal ngamsung lampi om ngawlna ah vakthap a, a teen natu khuapi paina lampi a mu zo bua uh hi.

⁵Amate a ngilkialin a dangtaak a, lametna bangma a nei nawn bua uh hi.

⁶Tuasia ciang a ngim ngana sung pan amate in TOPA biakpui uh a, ama in a cimawkna uh sung pan hun hi.

⁷Ama in lampi tang khat tawnin amate lampui a, a teen thei natu khuapi khat ah then hi.

⁸Amate atu nalamdang a septe hang le ama ii itna kip hu in amate in TOPA tungah lungdamko tu uh hi.

⁹Ama in a dangkote dangcimsak a, a ngilkialte an phate taw ngilvasak hi.

¹⁰Pawlkhatte khuangaina le khuazing sungah teang a, luangta in thikkol kibul uh hi,

¹¹banghang ziam cile amate in Vaanglianbelpa Pathian thupiakte nalh a, ama hilnate nial uh hi.

¹²Amate in na ham sepna taw a tha uh tul hi; amate puk tu a, kuama in a hu buatu uh hi.

¹³A ngim nga uh ciang amate in TOPA biakpui a, ama in a cimawkna uh panin hun hi.

¹⁴TOPA in amate sia khuangaina le khuazing sung pan pusua a, a thikkolte sukthapsak hi.

¹⁵Amate atu a lamdang na a septe hang le a itna kip hu in amate in TOPA tungah lungdamko hamtang tu uh hi.

¹⁶Taau taw kivawt kongkhate ama in saattham a, a ki uumna thikzawlte sutan hi.

¹⁷Pawlkhatte mawmaw a, a mawna hu le a ngitlo hu in thuak uh hi;

¹⁸amate in an kii a, thi dedek in om uh hi.

¹⁹Tuaciang a ngim nga uh ciangin amate in TOPA sam a, amate cimawkna sung pan TOPA in hun hi.

²⁰Ama in a thupiakna taw amate damsak a, thaankuul panin hun hi.

²¹Amate atu a lamdang na a septe hang le a itna kip hu in amate in TOPA tungah lungdamko hamtang tu uh hi.

²²Ama tungah sangaw biakpiakna taw lungdamko hamtang tu a, lungdam lasakna taw ama sep sa theampo son hamtang tu hi.

²³Pawlkhatte in tuipite tungah teambawte taw khualhaw in tuipi tung panin a nuntak natu zong uh hi.

²⁴Amate in TOPA vawt thei nate mu uh a, tuipi tungah a lamdang a vawtte mu uh hi.

²⁵Ama in thupia a, vuipi nasia mama khat hong va a, tua in tuihualte thawn hi.

²⁶Teambawte vui sung a saangna ah kilawnto in, a thukna ah tumsuk hi. Tuabang lauhuaina sungah teambaw naseamte a thinkiam uh hi;

²⁷amate sia zukhamte bangin lutu in hoi vatut uh a, amate thiamna theampo sia a kizangh thei bua hi.

²⁸A ngim nga uh ciang amate in TOPA biakpui a, a cimawkna uh panin ama in hun hi.

²⁹Ama in a kinuai vuipi suangvalte thimsak a, tuihualte dai hi.

³⁰Tua tuihualte a thim hu in amate lungdam a, amate thet nopna teambaw tawlngakna mun ngammuanna taw ama in then hi.

³¹Amate atu nalamdang a septe hang le a itna kip hu in amate in TOPA tungah lungdamko hamtang tu uh hi.

³²Mihingte kikhopna sungah amate in ama ii letna thangsak hamtang tu a, upate thu kikupna mai ah ama pok tu uh hi.

³³TOPA in ngunte kangcipsak a, ciktuite luangsak nawn ngawl hi.

³⁴Tua munah a teangte ii seksolna hangin, ama in leiphate ci al lei ngamtul suaksak hi.

³⁵Ama in sennealngam sia tuicingna mun suaksak a, lei kona mun sia ciktui luanna in kheal hi.

³⁶Ama in a ngilkialte tua munah teangsak a, amate in a teen natu in khuapi khat saat uh hi.

³⁷Amate in lote ah thaicii tu in sapitkung suan uh a, anlaak hun ciangin an tam mama la uh hi.

³⁸A mite ama in thupha pia a, ta tam mama hing uh hi; Khui honte zongh a kiam ngawl natu in ama in kepsak hi.

³⁹Ngitlo zawthawkna le ngim nganate hangin, Pathian mite ngallel in zawnsak a thuak uh ciang,

⁴⁰amate a zothawte ama in ngaimawkna lak a, lampi om ngawlna sennealngam sungah vakthapsak hi.

⁴¹Ahihang taangsapna a neite sia amate lungmanna panin ama in suatak a, a innkuanpuite tuu hon bangin pungsak hi.

⁴²Thutang mite in hi thu mu in lungdam uh a, ahihang a seksol theampo thimsak hi.

⁴³A ciimte in hi thute ngaisun thei tahen; TOPA ii itna kip ngaisun thei tahen.