Read Siyin Chin Psalm Late 109 Bible Online

Psalm Late 109 - Siyin Chin bible

Psalm Late 109

¹Pathian awng, nang kong pok hi; thim om top heak in!

²Mihing seksolte le leilot theite in kei hong sim hi. Amate in kei huvau leilot thu son hi,

³Kei hong siatson hi, a thu om ngawl bulin kei hong sim hi.

⁴Amate it in amate atu thungetsak ka hi hangin amate in kei hong ngalvawt hi.

⁵Amate in kei tungah phatna sia siatna taw, itna sia etsatna taw hong thuk kik hi.

⁶Ka ngalpa tungah thusit tu in a maan ngawl thukhenpa khat teal in a, ama ngalte khat ma in ama mawsiatsak in.

⁷Ama sia thu kisit in, a maw hunlam kilangh tahen; ama ii thungetna ngawngawn khialna lian khat bangin kituat tahen!

⁸A nuntakna hai ngawlin bo tahen; midang khat in a nasep lua tahen!

⁹A tate sia tanga suak tahen a, a zi meingong tahen!

¹⁰A tate inn nei ngawl khutdaw ngente suak tahen; a siacip sa a teenna pan amate kinot tahen!

¹¹A leibatnate in a neisa theampo laaksak tahen a, ama sep thaman theampo khualmite in nga tahen.

¹²Kuama in ama tungah dik ngei heak hen a, ama ii nusiat tangate sia kuama in khoi a keam heak hen.

¹³A suan a paal theampo mong tahen a, khang kik sungah a min kimangil tahen.

¹⁴A taanghpupite ngitlona sia TOPA in ciamtee hen a, a nu mawnate maisak ngei heak hen.

¹⁵Amate mawna sia TOPA in a tawntungin ciamtee tahen a, ahizong amate sia kimangil biing tahen.

¹⁶Tua pa in cikna thiamna ngaisun ngeingawl hi; ama in a zawng, taangsapna a neite le a hu tu a nei ngawlte vawtsia in thatlum hi.

¹⁷Ama in ngual tomlaw thanuam ahikom, ama kitomlaw tahen! Ama in thupha pia nuam ngawlhet ahikom, kuama in ama thupha pia heak hen!

¹⁸Ama in haamsiatna sia a puansilh bangin ngeina see hi; haamsiatnate in ama ii pumpi tui bangin tuamh tahen a, a ngu a taang sungah sathau bangin zenh tahen!

¹⁹Tua haamsiatnate in ama sia puan bangin tuam tahen a, kawngkhau bangin ama vial top tahen!

²⁰TOPA awng, kei hong langpanin kamsia a pau ka ngalte tungah tuabangin daan pia in.

²¹Ahihang Vaanglianpipa ka TOPA awng, nong kamciamsa bangin kei hong hu ta'n a, a pha na itna hangin kei hong suatak ta'n.

²²Keima in zawngin ka kitaangsamh hi; ka thinsung tawngh dongin na hi.

²³Nitak niliap bangin ka bo dektak hi; lungno khat bangin hong kiseamkeak zo hi.

²⁴Anneak kisap hu in ka khupte huang hi; keima in vun le ngu bek taw ka om hi.

²⁵Mihingte in kei hong mu ciangin hong nuisan uh hi; selnona taw a lu uh hong pei san hi.

²⁶TOPA ka Pathian awng, kei hong hu ta'n; na itna kip hu in hong hun ta'n!

²⁷Kei hong hunpa sia nangma na hi hunlam ka ngalte in hesak in.

²⁸Amate in kei hong tomlaw thei tu ahihang nangma in thupha nong pia tu hi. Kei hong vawtsiate in lelna thuak tahen a, keima, na naseampa hong lungdamsak ta'n.

²⁹Ka ngalte sia mindaina taw kituam tahen; amate in a maizumna sia puantual bangin silh tahen.

³⁰TOPA tungah lungdamkona nging takin ka pia tu hi; mihingte kikhopna sungah ama ka pok tu hi,

³¹banghang ziam cile ama in mizawng pa hung a, a thi natu in a puavawkte kung panin amate suatak hi.