Read Siyin Chin Psalm Late 115 Bible Online

Psalm Late 115 - Siyin Chin bible

Psalm Late 115

¹TOPA awng, na itna kip le na thumaanna hangin na minthanna sia kote tungah hi ngawlin, nang tung bek ah om tahen.

²Banghangin minam tuatuamte in, “Na Pathian uh koisungah om ziam?” ci in hong dongh tu ziam?

³Ih Pathian in vantung ah om hi; ama in a uuk pawpo seam hi.

⁴Amate ii pathiante sia ngunn le khamh taw kivawt a, mihing khutte taw kivawt hi.

⁵Tua pathiante in kamte nei ahihang pau thei ngawl a, mittangte nei ahihang, khuamu thei ngawl hi.

⁶Amate in bilte nei ahihang khua za thei ngawl a, naakte nei ahihang a ngim za thei ngawl hi.

⁷Amate in khutte nei ahihang tham thei ngawl a, peangte nei ahihang lampai thei ngawl hi; amate in aw ngingsak thei ngawl hi.

⁸Tuabangte vawt a tuate ma a muangte in amate vawt milimte bang suak siat tahen.

⁹No, Israel te awng, TOPA muang vun. Ama in no hong hu a hong dal hi.

¹⁰No, Pathian thiampite awng TOPA muang vun. Ama in no hong hu a hong dal hi.

¹¹No, ama a biate theampo awng, TOPA muang vun. Ama in no hong hu a hong dal hi.

¹²TOPA in eite hong phawk a thupha hong pia tu hi; ama in Israel te le Pathian thiampite theampo thupha pia tu hi.

¹³Ama a zaktate theampo a lian, a no a kibangin ama in thupha pia tu hi.

¹⁴TOPA in no le na suan na paalte uh tungah hin le toai hong pia tahen!

¹⁵Van le lei a vawt TOPA in note thupha hong pia tahen.

¹⁶Vantung sia, TOPA bek ii neisa hi a, ahihang simlei sia mihingte atu in pia hi.

¹⁷TOPA sia, ngam thimna a zuansuk mithite peuma in pok ngawl uh hi.

¹⁸Ahihang ei a nungtate in tu le a tawntungin ama tungah lungdam ih ko tu hi. TOPA pok vun!