Read Siyin Chin Psalm Late 135 Bible Online

Psalm Late 135 - Siyin Chin bible

Psalm Late 135

¹TOPA pok vun! No TOPA naseamte awng, ama min pok vun.

²TOPA ii inn sung le, ih Pathian Biakinnpi sungah a dingte awng, TOPA pok vun!

³TOPA pok vun, banghang ziam cile ama pha hi; ama ii min pokna late sa vun, banghang ziam cile ama dik hi.

⁴Ama in ama atu in Jacob teal a, ama aituam tu in Israel mite teal hi.

⁵Ih TOPA lian hi ci in ka he a, pathian dang theampo sangin lianzaw hi.

⁶Vantung le leitung ah ahizong, tuipi sung le a nuai a thuknate ah ahizong ama uuk pawpo a vawt hi.

⁷Ama in leitung mong panin vuipi meeite hong puak hi; ama in vuipi suangvalte atu in khualeng vawt a, tuaciangin vuite sia ama ii kholna sung panin pusua hi.

⁸Egypt ngam ah ama in mihing le nganhingte ii taciil tek a kibangin thatlum hi.

⁹Tua munah nalamdangte le a lamdadangte kumpipa le a upate daan piak natu in vawt hi.

¹⁰Ama in ngam tuatuam tam ma susia a, a thahat kumpite thatlum hi.

¹¹Tuate sungah Amor kumpipa Sihon, Bashan kumpipa Og, le Canaan kumpi theampo kihel hi.

¹²Amate ii leitangte sia ama in a mite pia hi; ama in tuate Israel mite pia hi.

¹³TOPA awng, nangma sia Pathian hi ci in a tawntungin hong kithangsak tu hi; khang theampo in nang hong phawk tu hi.

¹⁴TOPA in ama ii mihingte hung tu hi; ama in a naseamte hesuak tu hi.

¹⁵Tua minamte ii pathiante sia mihingte ii khut taw a vawt tawm khamh le ngunn taw a kivawtte ahi hi.

¹⁶Amate in kam nei ahihang a pau thei bua hi, mit nei ahihang a mu thei bua uh hi.

¹⁷Amate in bil nei ahihang khua a za thei bua uh hi; amate sia hu ngawngawn a sang thei bua uh hi.

¹⁸Tuate a vawtte le a muangte theampo sia amate vawt sa milimte bangma suak tahen!

¹⁹Israel mite awng, TOPA pok vun; no Pathian thiampite awng, ama pok vun!

²⁰No Levi mite awng, TOPA pok vun; no ama a biate theampo awng, ama pok vun!

²¹TOPA sia Zion ah pok vun, a inn ahi Jerusalem ah pok vun. TOPA pok vun!