Read Siyin Chin Psalm Late 139 Bible Online

Psalm Late 139 - Siyin Chin bible

Psalm Late 139

¹TOPA awng, nangma in nong sit ngiingeei zo a nong he hi.

²Nangma in ka sep ka vawt theampo na he hi; ka ngaisutna theampo a khuala na panin na he hi.

³Na ka sep laitak ahizong, ka tawlngak laitak ahizong, nong mu hi; ka ngamtatna theampo na he hi.

⁴Ka pau ma ngawngawn in ka son tu teng na he zo hi.

⁵Nangma in ka kiimkot mun theampo ah na om hi; na vaangletna taw kei nong dal hi.

⁶Kei nong heakna sia thuk mama a; kei tel zawk ahi bua hi.

⁷Nangma pial in koisung zuan thei tu khi ziam? Nang omna pan koisungah ka tai thei tu ziam?

⁸Vantung ah paito kaleng zong tua munah na om hi; mithi khua ah lum kaleng zong tua munah na om hi.

⁹Nisuana kalhin ka leang hial zong ahibuale nitumna sang a khuala belna ah teang kaleng zong

¹⁰kei hong lampui tu in tua mun ma ah na om tu hi, kei hong hu tu in tua mun ma ah na om tu hi.

¹¹Khuazing ii hong sealcip natu, tua ahibuale ka kiimkot khuavak sia zan a suak tu in ka ngen thei hi,

¹²ahihang khuazing ngawngawn nang atu zing tuan ngawl a, zan sia sun bangin a taang hi. Khuazing le khuavak sia nang atu in kibang hi.

¹³Nangma in ka pumpi sungah a om na theampo na bitphua hi; Ka nu naubu sungah ka pumpi nong ngawmtua hi.

¹⁴Nangma kong pok hi, banghang ziam cile nangma in kiitak tu na hi hi; na sep na vawt theampo tumdangin lamdang hi. Tuasia ka thinsung theampo taw ka he hi.

¹⁵Ka ngute kipiangsak in, ka nu naubu sungah pha takin kingawmtua a, a thimtham in ka khanto hunin, tua munah ka om hunlam nong he hi.

¹⁶Ka sua ma in kei nong mu zo hi. Kei atu hong kisee sa ni le hunte a kipat ma in na laibu sungah kiciamtee siat zo hi.

¹⁷Pathian awng, na khua ngaisutnate sia kei tel tu bangza haksa ziam, bangzata tam ziam!

¹⁸Keima in tuate sim hi leng senvui za sangin tamzaw tu hi. Ka khanlaw ciang zong nangma taw ma ka omkhawm lai hi.

¹⁹Pathian awng, mihing seksolte hong thalupsak le te ka uuk hi! mihing ngoltolte, kei hong nusia in tai le ka uuk hi!

²⁰Amate in nangma taw kisai in seksol kamte hong zangh uh hi; na min siat thethei natu in pau uh hi.

²¹TOPA awng, nang hong ngaimawte bangza in ngaimaw khi ziam! Nang hong langpante bangza in ensan khi ziam!

²²Amate sia ngaimawk tawpin ka ngaimaw hi; amate keima ngal bangin ka nei hi.

²³Kei hong sit ta'n, Pathian awng, ka thinsung hong he ta'n; hong sittel ta'n a, ka ngaisutnate a thakin na mu in.

²⁴Ka sungah siatna a om ziam hong mu ta'n a, tawntung lampi ah kei lam hong pui ta'n.