Read Siyin Chin Psalm Late 140 Bible Online

Psalm Late 140 - Siyin Chin bible

Psalm Late 140

¹Mihing tatsiate kung panin hong hun ta'n, TOPA awng, mihing ngoltolte kung panin hong keamcing ta'n.

²Amate in a tawntungin a sia vawt tu a sawm ku uh a, kihau thei natu in ngual a hol tawntung uh hi.

³Amate ii leeite sia hong thisak thei ngulte taw kibang a; amate kammal in ngulsok ii nguu bang ahi hi.

⁴A seksolte thahatna panin hong dal tan TOPA awng, ka puk natu hong sawm ku a ngoltol mite kung panin hong keamcing ta'n.

⁵Mihing kiphasak te in thaang hong sia hi; amate in khau thaangte pha in lamdung ah kei hong mat natu in thaangte keaksa in koi uh hi.

⁶“Nangma in ka Pathian na hi hi,” TOPA tungah ka ci hi. TOPA awng, hu ngen a kong auna hong za ta'n!

⁷Vaanglianpipa ka TOPA awng, a tha kho kei hong hungpa, nangma in ngal kidona sungah nong dal zo hi.

⁸TOPA awng, a seksolte ii deite pia heak in; amate sawmku thute taangtungsak heak in.

⁹Ka ngalte in hong zosak heak in; amate ii kei hong tawn nate amate tungah tusak kik in.

¹⁰Meikam san vahem te amate tungah taak tahen; dum sungah amate kilawn suk tahen a, pusuak ngei nawn heak hen.

¹¹Midangte maw a suan khialte, zawna nga heak hen; mihing ngoltolte sia siatna in ban tahen a, lalsak tahen.

¹²TOPA awng, nangma in mizawngte vai le, a cimawte ii nga tu a kilawm thute ah na panpui sia ka he hi.

¹³A thutangte in nang hong pok takpi tu hi; amate sia nangma ii omna munah teang tu uh hi.