Read Siyin Chin Psalm Late 143 Bible Online

Psalm Late 143 - Siyin Chin bible

Psalm Late 143

¹TOPA awng, ka thungetna hong za ta'n! Na thutang sungah kong maangkaana hong ngai ta'n; na thumaanna hangin kei hong zo ta'n!

²Kei na naseampa thusitna hong thuaksak heak in; nang muna ah a maw ngawl kuama a om bua hi.

³Ka ngalpa in savai bangin hong vai a hong zothal hi. Ama in thongzing khat sungah hong khum zo a, ngei tawngh lai ah a thisate bang ka hi hi.

⁴Tua ahikom, a cimaw hi zo ing ci tu in ka kithoai a, ka thinkiam dikdek hi.

⁵A bosa nite ka phawk hi, na sepsa theampo ka ngaisun hi, na ngamtatna sa theampo ka thin sungah ka sut kikik hi.

⁶Thungenin ka khutte nang kungah kong laamto hi; lei ko bangin ka thaa in nang hong dangtaak law hi.

⁷Tu ma in hong zo ta'n, TOPA! lametna theampo ka bosua zo hi. Kei kung panin buu heak in, na buu le kei sia mithi khua a zuansukte taw ka omkhawm tu hi.

⁸Zing simin na itna kip hong phawksak kik ta'n, banghang ziam cile nangma kong muang hi. Ka thungetnate nang kung hong theng hi, ka tot tu lampi hong lak ta'n.

⁹Kidalna nga tu in nang kungah kong pai hi, TOPA ; ka ngalte kung panin hong suatak ta'n.

¹⁰Nangma in ka Pathian na hi hi; na deina bang ka vawt thei natu hong hil ta'n. Kei tungah hong dik ta'n a, a muanhuai lampi ah lam hong pui ta'n.

¹¹TOPA awng, nong kamciamsa bangma in hong suatak ta'n; na phatna taw ka ngim ngana sung pan hong hun ta'n!

¹²Kei nong itna hu in ka ngalte that in a, kei hong zothaw theampo na susia in, banghang ziam cile kei sia na naseampa ka hi hi.