Read Siyin Chin Psalm Late 145 Bible Online

Psalm Late 145 - Siyin Chin bible

Psalm Late 145

¹Na letna ka thangsak tu hi, ka Pathian le ka kumpipa awng; a tawntung a tawntungin lungdam kong ko tu hi.

²Ni simin nang tungah lungdam kong ko tu hi; a tawntung a tawntungin nang kong pok tu hi.

³TOPA sia lian ahikom, nasia takin pok tu ahi hi; ama ii letna in tel zawk ahi bua hi.

⁴Na sepsate hu in khang khat panin khang khat ah hong kipok tu hi; amate in a nasia mama na sepnate thangsak tu hi.

⁵Amate in na minthanna le na letnazia son tu uh a, a lamdang na sepnate thuk takin ka ngaisusun tu hi.

⁶Mihingte in a lianpi na sepnate son tu a, na letna ka thangsak tu hi.

⁷Amate in na phatna theampo son tu a, na thuthiamna la in sa tu uh hi.

⁸TOPA in itna le hesuakna nei a, thinsau in itna kip taw kidim hi.

⁹Ama sia mihing sim tungah pha in, a vawt theampo tungah mulkimna nei hi.

¹⁰TOPA awng, na bitphua sa nuntakna nei theampo in nang hong pok tu a, na mite theampo in lungdam hong ko tu hi.

¹¹Amate in na kumpi vaangletna ii minthanna sia thuson in nei tu a, na thakhona thu son tu uh hi,

¹²tuasia ciang mihing theampo in na sepna lianpite he tu a, na kumpingam sungah na minthanzia hong he tu uh hi.

¹³Na ukna kip tawntung a, nang sia a tawntungin kumpipa na hi hi. TOPA in a kamciamnate tungah thumaan a, a ngamtatna sung theampo ah hesuak thei hi.

¹⁴Ama in ngim a ngate theampo hu hi; a puksa theampo phongto hi.

¹⁵Nuntakna a nei theampo in lametna taw nang hong mitsuan a, amate kisap ciangin an na pia hi.

¹⁶Amate a kikhom in na pia a, kitaangsapna theampo ah a lung na kimsak hi.

¹⁷TOPA in ama ii sepna theampo sungah thutang a, a ngamtatna sung theampo ah hesuak thei hi.

¹⁸Ama a kote, thintak taw a samte nai ah ama om hi.

¹⁹Ama a zaktate ii kitaangsapnate ama in sik hi; amate auna za in hun hi.

²⁰Ama a it theampo ama in sungsia hi, ahihang a seksolte susia tu hi.

²¹TOPA ka pok tawntung tu hi; ama bitphua sa nuntakna nei theampo in a min thiangtho a tawntungin pok tahen.