Read Siyin Chin Psalm Late 147 Bible Online

Psalm Late 147 - Siyin Chin bible

Psalm Late 147

¹TOPA pok vun! Ih Pathian tungah, pokna la sak tu pha hi; ama pok tu sia nuam a maan hi.

²TOPA in Jerusalem thaksua kik a, ngamdang ah saltaangte hong ciapui kik hi.

³Ama in thin kitamhte damsak a, a liammate tuamsak hi.

⁴Ama in aksite a phakza tu see a, khat sim a min taw sam hi.

⁵A lian a thakho sia eite TOPA hi; ama ciimna in kitee thei ngawl hi.

⁶Ama in a kiniamkhiak te laamto a, ahihang a seksolte lei ah sucip hi.

⁷TOPA tungah pokna biakna late sak vun; Ih Pathian tungah tengtongh taw music tum vun!

⁸Ama in van ah meeite phalh hi; ama in leitung atu in nguatui pia a, mualte tungah lopa posak hi.

⁹Ama in nganhingte an pia a, va-ak note a au uh ciang anvaak hi.

¹⁰Ama ii nuam a sak sia siphu thahatte hi ngawl a, ama ii dik a sak zongh ngalkap hangte ahi bua hi.

¹¹Ahihang ama in ama a zaktate le ama ii itna kip a muangte tungah lungkim hi.

¹²TOPA pok in, Jerusalem awng! Na Pathian pok in, Zion awng!

¹³Ama in na kongpite khosak a, na mite thupha pia hi.

¹⁴Na ngamngi uhte bitsak a, zungtaang phabelte taw hong lungkimsak hi.

¹⁵Ama in simleitung ah thupia a, ama ci babang, a manlang in kiseam hi.

¹⁶Ama in vuuk sia puanvan khat taw kibangin phalh a, thuamluak sia leivui bangin thethaang hi.

¹⁷Ama in ngial sia suangpim bangin puak a, ama puak khuasik sia kuama in a thuak zo bua hi.

¹⁸Tuasia ciang ama in thupia a, tuikhalte tuitham hi; ama in vui vasak a, tui luangsak hi.

¹⁹Ama in a mite tungah thupuak a, lamlaknate le thukhamte Israel te pia hi.

²⁰Ama in minam dangte tungah hi bangin a seam bua hi; amate in ama thukhamte a he bua uh hi. TOPA pok vun!