Read Siyin Chin Psalm Late 18 Bible Online

Psalm Late 18 - Siyin Chin bible

Psalm Late 18

¹TOPA awng, bangza in nang hong it khi ziam! Nangma in kei hong hungpa na hi hi.

²TOPA in kei hong dal pa hi a, ama sia a kip a kho ka kulhpi `ahi hi. Ka Pathian in ka kidalna hi, ama taw ka kikop ciang kei ka ngammuang hi. Ama in lum bangin kei hong dal hi, ama in kei hong dal a, hong sungsia hi.

³TOPA ka biakpui a, ama in ka ngalte khut sung panin hong hun hi. TOPA pok tawng!

⁴A lauhuai thina in kei hong uumci a, lalna tuihual in kei hong nawk hi.

⁵A lauhuai thina in kei hong uumci a, thaankuul in a thaang taw kei hong sia hi.

⁶Ngimna kawmkaal pan TOPA ka biakpui hi; hong hu tu in Pathian ka biakpui hi. A biakinn sungah ka aw hong za hi; hu ngenin ka auna ama in hong ngai hi.

⁷Tuasia ciang leitung sia liingin ngawk hi; mualte ii tawdapte kilokin phe vadil hi, banghang ziam cile Pathian thin uuk hi.

⁸A naak hawng sung panin meikhute hong buak hi, a kam sung panin a kaanghtumsak thei meikamte le meikuangte hong pusuak hi.

⁹Ama in van sia eautham in meeikaaivom sisanh in hong tuaksuk hi.

¹⁰Ama in Cherub khat tungah to in manlang takin leang hi; ama in vui ii thate tungah khualhaw hi.

¹¹Ama le ama khuazing taw kituam a, tui taw a kidim meeikaai saate in kiim uum hi.

¹²Ngialtangte le meileng vazalte ama mai khualeng panin hong pai a meeizingte phullet hi.

¹³Tuaciang TOPA in van panin vanto bangin hong pau a, Saangbel Pa aw kiza hi.

¹⁴Ama in a thaltangte hong kap a, a ngalte kithethaangsak hi; khualeng tee vazialte taw amate taisak hi.

¹⁵TOPA awng, na ngalte na teih ciang le thin uukin amate na oksat ciang, tuipi taw le lei tawdapte kilawt hi.

¹⁶TOPA in ka tung panin hong zamsuk a kei hong len hi; ama in tuithukte panin hong kaito hi.

¹⁷A thahat ka ngalte le kei hong ensante kung panin hong suatak hi — amate in kei atu in hat lei hi.

¹⁸Ka ngim nga laitakin amate in kei hong sim hi, ahihang TOPA in hong dal hi.

¹⁹Ama in launa sung panin hong hu hi, banghang ziam cile ama in kei sia dik hong sa a, hong hun hi.

²⁰TOPA in kei thaman hong pia hi banghang ziam cile a maante sep le vawtin ka nei hi; ama in keima thupha hong pia hi, banghang ziam cile kei mawna ka nei bua hi.

²¹TOPA thukham ka zui zo a, ka Pathian kung panin ka pial bua hi.

²²Ama thukhamte theampo ka tang zo a, ama thupiakte ka nit ngawl a om bua hi.

²³Ama in ka sitbaan ngawlna, khial ngawl tu in ka kikepna hong he hi.

²⁴Tua ahikom ama in telte hong pia hi, banghang ziam cile a maan na seamin ka maw ngawl hunlam hong he hi.

²⁵TOPA awng, hong thumaante tungah na thumaan hi; a cialcingte ii tungah a kicingin na dik hi.

²⁶A thiangthote tungah na thiangtho hi; ahihang a seksolte na ngal vawt hi.

²⁷A kiniamkhiak te na hun hi, ahihang a kiphasakte na niamsak hi.

²⁸TOPA awng, kei khuavak nong pia hi; ka khuazing na bosak hi.

²⁹Ka ngalte ka sim natu in thahatna nong pia hi, tuaciang amate ii kinannate ka zaw natu tha nong pia hi.

³⁰Hi Pathian ii nasepnate bangza in cialcing ziam! Ama kammalte bangza in suan thamman ziam! Ama ii huuk tu a zongte theampo atu in Ama in lum taw kibang hi.

³¹TOPA bekma Pathian ahi hi; Pathian bekma ei kinanna ahi hi.

³²Ama in kei hong thahatsak Pathian hi a, ka lampi bitsak hi.

³³Ama in sangai bangin ka peang hong khosak a, mual tungah hong keamcing hi.

³⁴Thal khobel sia ka zak thei natu in ama in ngal kido zia hong sinsak hi.

³⁵TOPA awng, nangma in nong dal a nong hun hi; nangma ii nong khoina in hong liansak a, na vaangletna in hong keamcing hi.

³⁶Kipummat natu panin nong keam a ngalte khut sung ka theng ngei bua hi.

³⁷Ka ngalte ka del a, amate ka man hi; amate ka lalsak mateng in ka tawlnga bua hi.

³⁸Amate ka vaatvawk a, a tho kik thei bua uh hi; ka mai ah ngallel in amate liik uh hi.

³⁹Nangma in kidona sung a zak tu thahatna nong pia a ka ngalte nong zosak hi.

⁴⁰Ka ngalte ka kung panin a tai natu in na vawt hi; kei hong ensante ka lalsak hi.

⁴¹Amate in hu ngenin au ahihang kuama in amate hun ngawl hi. Amate in Topa biakpui hi, ahihang Ama in a zo bua hi.

⁴²Amate leivui bang ahi dongin ka sucip a, vui ii let leivuite bang ahi uh hi. Lampite ah buan omte bangin amate ka tuanhcil hi.

⁴³Ngal phuang mihingte kung panin nong hun a tua ngamte a uk tu in kei nong siam hi; ka heak ngeingawl mite, tu in ka khutnuai mi suak uh hi.

⁴⁴Ngamdangmite sia ka mai ah kun uh hi; ka thu hong zaak ciangin ka thu ni uh hi.

⁴⁵Amate in thinkiamin a kulhte uh sung pan a liing sa in hong pai uh hi.

⁴⁶TOPA nungta hi! Kei hong hungpa pok vun! Kei hong hun Pathian letna thangsak vun.

⁴⁷Ama in ka ngalte hong zosak hi; ngam tuatuamte ka khutnuai ah biiksak vakheau a,

⁴⁸kei sia ka ngalte khut sung panin hong hun hi. TOPA awng, ka ngalte nong zosak hi; tuaciang a ngoltol mihingte khut sung panin nong dal hi.

⁴⁹Tua ahikom ngam tuatuamte kawm ah nang kong pok hi; nang tungah pokna la kong sak hi.

⁵⁰Pathian in zawna lian mamate a kumpipa tungah pia hi; ama in itna kip sia ama tealsa David le ama suan le paalte tungah a tawntungin lak hi.