Read Siyin Chin Psalm Late 19 Bible Online

Psalm Late 19 - Siyin Chin bible

Psalm Late 19

¹Van in Pathian minthanna thiang takin kilanghsak hi! Ama nasepna huvau in a kician mama in lak hi!

²Ni simin tua thu kisawson a, zan simin kison kikik hi.

³Thusonna ahibuale kammalte kizangh ngawl a, awnging zongh kiza ngawl hi;

⁴ahitazong amate ii thupuak sia leitung bup ah kizel a leimong dongin kiza hi. Pathian in ni atu in van ah inn khat vawtsak hi;

⁵a lungdam zinei pa bangin zingsang in hong pusuak hi, tai kidem tu a lawp kimai thiamte bang ahi hi.

⁶Van mong khat pan hong kipan a, van laizang kaantanin a langkhat dongah pai hi. Ama ii satna sia bangma in lia thei ngawl hi.

⁷TOPA thukham sia cialcing a; thahatna thak a pia hi. TOPA thupiaknate sia muan thamman a, a kitaangsamhte atu in ciimna pia hi.

⁸TOPA ii thukhamte maan hi, tuaciang tua thukham a nite lungdam hi. TOPA thupiakte tang a, thinsung heakna pia hi.

⁹TOPA thasiana sia pha a, a tawntungin kizom paisuak tu hi. Topa thukhennate sia tang a, tuate sia a tawntungin maan hi.

¹⁰Tuate sia khamh pha belte sangin dei huai zaw a, khuaitui thiangbel sangin thum zaw lai hi.

¹¹Tuate in na naseampa, keima heakna hong pia a; tuate ka nit hu in tel ka saang hi.

¹²Kuama in ama mama ii khialnate a mu thei bua hi; Topa awng, a kiseal khialnate panin hong hung ta'n!

¹³Vawtluih mawnate panin hong keamcing si ta'n a; tuate in kei hong uksak heak in. Tua hile ka cialcing tu a, mawna ii siatna khaatna pan ka suakta tu hi.

¹⁴Ka bukna le hong tanpa ka TOPA awng, ka ngaisutnate le ka kampaunate nong saan thei hi tahen!