Read Siyin Chin Psalm Late 20 Bible Online

Psalm Late 20 - Siyin Chin bible

Psalm Late 20

¹Ngimna na nga ciangin TOPA in na biapuina hong zo tahen; Jacob ii Pathian in nang hong dal tahen!

²Ama in a Biakinnpi panin nang kungah huna hong puak tahen, tuaciangin Zion Mual panin panpuina hong pia tahen!

³Na piakkhiatnate theampo ama in hong saang tahen a, na sangaw biakpiaknate theampo ama lungkim tahen.

⁴Na dei sia ama in hong pia tahen a na tupna theampo ah zawna hong ngasak tahen.

⁵Tuasia ciang nang ii zawna tungtaang ah lungdamna taw kong au tu uh hi, Eite ii Pathian pokna taw na zawna poai ka khaam tu uh hi. TOPA in na nget theampo hong tungsak tahen.

⁶TOPA in ama tealsa kumpipa sia zawna pia hi ci, tu in ka he hi; ama in a thiangtho vantung panin ama ii ngetnate zo hi, tuaciang ama ii vaangletna taw zawna lianpi te pia hi.

⁷Pawlkhat in amate ii ngalsimna siphu ngalleangte muang hi, a dangte in a siphute muang uh hi, ahihang eite in TOPA ih Pathian ii vaangletna ih muang hi.

⁸Tuabang mihingte sia lutu in liik tu uh hi, ahihang eite tho in kip takin ih ding tu hi.

⁹TOPA awng, kumpipa tungah zawna na pia in a, kong biapui uh ciangin hong zo ta'n.