Read Siyin Chin Psalm Late 21 Bible Online

Psalm Late 21 - Siyin Chin bible

Psalm Late 21

¹TOPA awng, kumpipa lungdam hi, banghang ziam cile ama thahatna na pia hi; ama ngalzo pa na suasak manin lungdam hi.

²Ama ii lungngul sia na pia zo a, hong ngetna bangin na zo kik zo hi.

³Ama kungah thupha lianpite taw nong pai a a lu tungah khamh kumpilukhu na khusak hi.

⁴Ama in nuntakna hong ngen a, tuasia ma na pia hi, khansau le a kikhomsuan nuntakna na pia hi.

⁵Nangma huna hangin ama ii minthanna lian a, ama sia minthanna le uk theina vaang na pia hi.

⁶Na thuphate ama tungah a tawntungin om a, na ompuina hu in ama sia lungnopna taw kidim hi.

⁷Kumpipa in Vaanglianbelpa TOPA muang a, Topa ii a kip itna hu in ama sia a ngam muang tawntung tu hi.

⁸Kumpipa in a ngalte pummat siat tu a, ama a ensan theampo man tu hi.

⁹Ama hong kilaak tak ciang amate sia meilingh pui ii a kak bangin susia tu hi. TOPA in a thin uukna taw amate valh tu a, meikuang in amate kaanghtum tu hi.

¹⁰Kumpipa in thatlum siat tu a, a suan a paal kuama a taang buatu hi.

¹¹Amate in kumpipa thasawm uh a, ahihang a taangtung buatu hi.

¹²Ama in a thaltangte taw amate kap tu a, nungsangah leetaisak tu hi.

¹³TOPA awng, Na thahatna lianpi hu in kong pok uh hi! Na vaangletna pokin, la kong sak tu uh hi.