Read Siyin Chin Psalm Late 22 Bible Online

Psalm Late 22 - Siyin Chin bible

Psalm Late 22

¹Ka Pathian, ka Pathian awng, banghangin kei hong nusia ni ziam? Cimaw in, nong hu natu hong ausan khi hi, ahihang huna hong pai tuan ngawl lai hi.

²Ka Pathian awng, sunin kong biakpui hi, ahihang nong zo bua hi; zanin kong biakpui hi, ahihang thin muanna ka nga tuan bua hi.

³Ahihang nang sia Israel te ii a pok, a Thiangtho Pa in na maang hi.

⁴Ka taanghpupite in nang hong muang hi; amate in nang hong muang a, nang in amate na hun hi.

⁵Amate in nang hong ko a, launa panin suakta uh hi; amate in nang hong muang a, thinkiamna a thuak bua uh hi.

⁶Ahihang kei sia mihing zongh hi nawn ngawl khi hi; lungno khat ka hi a mihing theampo in hong thusim ngawlin hong nunau uh hi;

⁷Hong mu theampo in hong selno hi; a leei uh hong daw a, a lu uh hong pei san hi.

⁸“Nangma in TOPA na suang hi. Banghangin nang hong hun ngawl ziam? TOPA in hong it ahi le banghangin nang hong hu ngawl ziam?” amate in hong ci san hi.

⁹Bit tak a hong piangsak sia nangma na hi a, tuaciang nausen ka hi lai in nong keamcing hi.

¹⁰Ka pian ni panin nang kong suang a, nang sia ka Pathian na hi tawntung hi.

¹¹Ngimna hong nai a, hong hu tu kuama om ngawl ahiciang, kei kung pan kiheam heak in.

¹²Khuitalte bangin ka ngalte in hong kiim uum a; ka kiimkot ah om uh hi, amate sia a kiitakhuai Bashan ngam khuitalte bang ahi uh hi.

¹³Amate in tawpite bangin a kam uh kaa a, hawkin kei hong laai uh hi.

¹⁴Ka tha tual zo a, lei ah tui buak bangin bo vangeu hi. ka ngu kipeenate zongh kipealkhial siat zo a, ka lungtang sia khuainun tuitham bang hi.

¹⁵Ka longtawl sia leivui bangin ko a, ka leei sia ka vadang ah kibelto hi. Leivui sungah a thi tu in nong nusia zo hi.

¹⁶Mihing ngilo honkhat sia ka kiim ah hong om a, uihonte bangin kei hong neak hi; amate in ka khut le ka peang pan hong laai hi.

¹⁷Ka ngu ka taangte sia lawt siat a, ka ngalte in hong en a hong sal uh hi.

¹⁸Amate in ka puante a hawm natu in aisaan hi.

¹⁹TOPA awng, kei kung panin kiheam heakin a, kei hong suatak tu in a manlangin hong pai ta'n.

²⁰Namsau panin hong hun ta'n a, hi uite panin ka nuntakna hong hun ta'n.

²¹Hi tawpite panin hong suatak ta'n; hi ngam khuitalte mai ah cimaw in ka om hi.

²²Ka mipuite tungah nangma ii nong sepsaksate ka son tu a, amate kikhopna sungah nang kong pok tu hi.

²³“TOPA naseamte awng, ama pok vun! Jacob suante awng, ama zatakna pia vun! no Israel mite awng, ama bia vun!

²⁴Ama in a zawngte ngaingon in ahibuale amate thuaknate awlmawk ngawlin a om bua hi; amate a nungngat bua a, hu ngenin a biapui uh ciang ama in zo hi.

²⁵Mihonpite kikhopna sungah nangma ii nong sepsaksate ka pok tu hi; nang hong biate ii omna munah ka kamciamsa sangaw biakpiakna ka pia tu hi.

²⁶Mizawngte in a du zaza ne tu uh a, TOPA kung a zuan peuma in ama a pok tu uh hi. Amate in a tawntungin nuamsa tahen!

²⁷Ngam theampo in TOPA a phawk tu uh hi. Leitung mun tuatuamte panin ama a zuan tu a minam theampo in ama a bia tu uh hi.

²⁸TOPA sia kumpipa hi a, ama in ngam theampo uk hi.

²⁹Mihing kiphasak theampo in ama mai ah kun tu a, a thithei theampo in ama mai ah kun tu hi.

³⁰Maisang khangkikte in ama atu seam tu uh hi; amate in hong khang pheang tute tungah Topa thu son tu uh hi.

³¹A piang pheang tu mite tungah “Topa in a mite hun hi” ci in kison tu hi.