Read Siyin Chin Psalm Late 24 Bible Online

Psalm Late 24 - Siyin Chin bible

Psalm Late 24

¹Simleitung le a sungah a om theampo sia TOPA neisa ahi hi; leitung le a tungah a teang theampo sia ama aa ahi hi.

²Ama in tuipi taw ah, inn tawdap pha a, leinuai tuithukpite tungah sa hi.

³TOPA ii mual tungah pai thei natu akua in thu nei ziam? Ama ii a thiangtho Biakinnpi sungah akua tum thei tu ziam?

⁴Ngaisutna le ngamtatna a thiangthote, milim a bia ngawlte tua ahibuale a maan ngawl kamciam a vawt ngawlte pai thei tu hi.

⁵Tuabangte sia TOPA in thupha pia in hun tu hi; Pathian in amate sia maw ngawl hi ci tu hi.

⁶Pathian kungah hong pai, Jacob ii Pathian kung a zuan tu te sia tuabang mite ahi hi.

⁷Kongpite hongkeak vun a, taangh kongkhate hong tavun, minthang kumpipa hong tum tu hi.

⁸Minthang kumpipa sia akua ziam? Ama sia TOPA hi a, a thahat le a thakho, ngal a zo TOPA hi.

⁹Kongpite hongkeak vun a, taangh kongkhate hong tavun, minthang kumpipa hong tum tu hi.

¹⁰Minthang kumpipa sia akua ziam? Zawna mualsua TOPA — ama sia minthang kumpipa ahi hi.