Read Siyin Chin Psalm Late 26 Bible Online

Psalm Late 26 - Siyin Chin bible

Psalm Late 26

¹TOPA awng, maw ngawl hi hong ci ta'n, banghang ziam cile a maan in ka seam a, nang muan citakin hong muang khi hi.

²TOPA awng, hong veal ta'n a, hong sittel ta'n, ka deinate le ka khua ngaisutnate thu hong khen ta'n.

³Nong itna kip in kei lam hong lak a, na thumaanna in a tawntungin lam hong pui hi.

⁴A mannung ngawlte taw ka kithawl bua a, a kihitheamsakte bangma in ka sim bua hi.

⁵Mihing ngilote ii hong pawlpuina ka ngaimaw a, a seksolte ka pial hi.

⁶TOPA awng, mawbaang ngawl ka hi hunlam ka khut silin kong lak a, na biaknatau kiim ah pai in kong bia hi.

⁷Lungdamkona la kong sak a, a lamdang na nasepna theampo ka son hi.

⁸TOPA awng, na minthanna a omna mun, na teenna inn ka it hi.

⁹Mawneite taw hong susia khawm heak in a, ngual suamlumte thuak tute panin hong tongsak ta'n,

¹⁰ngitlona a vawt tawntungte le sumnguk a ne nuam tawntungte ii thuak tute hong thuaksak heak in.

¹¹Kei ka hi le a maanin ka seam hi. Kei hong hesuak ta'n a, hong hun ta'n.

¹²Launa theampo panin ka ngammuang a, ama mihingte ii kikhopna sungah TOPA ka pok hi.