Read Siyin Chin Psalm Late 27 Bible Online

Psalm Late 27 - Siyin Chin bible

Psalm Late 27

¹Topa in ka khuavak le kei hong ngumpa hi a, kuama ka kiita buatu hi. TOPA in launa theampo panin hong sungsia a, ka lau ngei buatu hi.

²Mihing ngilote in that tu in hong sim ciangin, amate lutu in puk uh hi.

³Ngalkap hon buppi in hong kiim uum hial zong ka lau buatu hi; ka ngalte in hong sim le zong Pathian ka muang veve tu hi.

⁴Topa tungah na khat ka ngen a, ka dei khat bek a om hi; ka khan tawntung TOPA inn sungah teang a, ama ii phatna lamdang ka sak tu le lam hong laknate nget tu ahi hi.

⁵Ngimna hun sungah ama in hong lia tu a, ama Biakinnpi sungah hong keamcing tu hi, tuaciang suangpi saang tungah ngammuangin hong koi tu hi.

⁶Tua ahikom ka kiim a ka ngalte tungah zawna mualsua na ka nei tu hi. Lungdamna taw au in a Biakinnpi sungah sangaw biakpiakna ka pia tu a; lasa in TOPA ka pok tu hi.

⁷TOPA awng kong biapui ciang hong za ta'n! Hong hesuak ta'n a hong zo ta'n.

⁸“Hong pai ta'n a hong bia ta'n” nong ci ciang, “Hong pai tu khi hi, TOPA awng,

⁹kei kung pan nangma le nangma hong kiseal heak in,” ci in ka zo hi. Kei tungah hong thin uuk heak in a, na naseampa hong nungngat heak in. Nangma in kei hong hupa na hi ngei zo hi; hong paisan heak in a, hong nusia heak in, Pathian, kei hong ngumpa awng.

¹⁰Ka pa le ka nu in hong nusia thei tha tu hi, ahihang TOPA in kei hong keamcing tu hi.

¹¹TOPA awng, nong sepsak nop thute, hong hil ta'n, Ngal tam mama ka nei hu in, a ngammuanhuai lampi ah lam hong pui ta'n.

¹²Leilot thu le tawnna taw hong ngalvawt ka ngalte khut sungah hong nusia heak in.

¹³Hi nuntakna hun sung mama ah TOPA phatna mu lai tu ci in ka kihe hi.

¹⁴TOPA muang in, upna nei in, thinkiam heak in. TOPA muang in!