Read Siyin Chin Psalm Late 28 Bible Online

Psalm Late 28 - Siyin Chin bible

Psalm Late 28

¹TOPA kei hong hungpa awng, nang kong biakpui hi. Ka auna hong za ta'n! Nong zo bua ahile, kei sia mithi khua a zuan suk te sungah ka kihel tu hi.

²Nang tungah hu ngenin kong au ciang le na Biakinnpi thiangtho sungah ka khut kong lap ciangin hong za ta'n.

³Mihing seksolte taw hong puavawk heak in, ngitlo nasep a seamte, a kam teng taw lawm bang a kithoai ahihang a thinsung uh ah etsatna a neite taw hong puavawk khawm heak in.

⁴Amate sep le vawt a ngitlo ngamtatnate hu in daan na pia in. Amate sepna theampo taw a kilawm in daan na pia in.

⁵Amate in TOPA ii sep le vawt sate a awlmawk bua uh hi; tua ahikom amate sia ama in daan pia tu a a tawntungin a susia tu hi.

⁶TOPA pokna pia vun; ama in hu ngen a, ka auna hong za zo hi.

⁷TOPA in hong dal a hong hung hi; ama ka muang hi. Ama in huna hong pia a hong lungdamsak hi. Lungdamna lasa in ama ka pok hi.

⁸TOPA in ama mite sungsia hi; ama in a tealsa a kumpipa hungin hun hi.

⁹TOPA awng, na mite hun in a, nangma neisate thupha pia in. Amate ii tuucingpa hi in a, amate keamcing tawntung in.