Read Siyin Chin Psalm Late 31 Bible Online

Psalm Late 31 - Siyin Chin bible

Psalm Late 31

¹TOPA awng, nong sungsiat tu in nang hong tu ka hikom lelna hong thuaksak ngei heak in. Nangma in a thutang Pathian na hikom; hong hun ta'n, thu kong ngen hi!

²Hong za ta'n a, tu mama in hong hun ta'n! Ka bukna hong hi ta'n a, hong dal ta'n; ka kihuukna hong hi ta'n a hong hun ta'n.

³Nangma in ka bukna le ka kihuukna na hi a, nong ciamsa bangma in lamlakin lam hong pui ta'n.

⁴Kei hong kisiana thaang panin hong keamcing ta'n a; launa panin hong khoi hong pao ta'n.

⁵Nong kepna sungah keima le keima kong ki aap hi. TOPA awng, nong hun tu hi. Nang sia a thumaan Pathian na hi hi.

⁶A maan ngawl pathiante, a biate na ensan hi, ahizong kei ka hile nangma kong muang hi.

⁷Ka lungdam in ka lawp tu hi, banghang ziam cile nong itna in kip hi. Ka thuakna nong musak a, ka ngim ngana nong heaksak hi.

⁸Ka ngalte in kei nong pummatsak bua a, ka pai nopna po ka pai thei natu in suatakna nong pia hi.

⁹Topa awng, kei hong hesuak ta'n, banghang ziam cile ngimna ka thuak a, ka kakaana in ka mit taak in, ka tha zawcip hi.

¹⁰Khuangaina in ka tha hong tatsak a, kaana in ka khan hong tomsak hi. Ka ngimna theampo hu in ka thazawm a, ka ngute ngawngawn ngot hi.

¹¹Ka ngalte theampo le a tuanin ka innpaamte in hong zawngsak hi; kei hong hete in hong kiita a, lam lai ah hong mu uh ciangin tai uh hi.

¹²A kuama po in kei sia a thisa bangin hong mangil siat zo a, a kivawksa na khat bang ka hi hi.

¹³Ngal tam mamate ii a kihuau ka za a, liinna launa sia ka kiimkot ah om hi. Amate in kei hong langpanin ngealna nei uh a, kei hong thasawm uh hi.

¹⁴Ahihang kei ii lung muanna in nangma na hi hi, TOPA awng, nangma in ka Pathian na hi hi.

¹⁵Kei sia nangma khoina sungah ka om tawntung hi; ka ngalte kung pan le hong vawtsiate kung panin hong hun ta'n.

¹⁶Na naseampa sia cikna taw hong en ta'n a, na itna kip taw hong hun ta'n.

¹⁷Topa awng, nang kong biakpui hi; maizumna hong thuaksak heak in, mihing seksolte maizumna thuak tahen; amate ahile mithi khua thim takin zuansuk tahen.

¹⁸A leilot theite, a kiphasakte, a kisathei le thutangte zawnsakna kam a paute na thimsak in.

¹⁹Nang hong upatte atu in a lamdang mama nate na khealsia hi! A kuama po in nangma bangza inpha ci sia hong he tek hi, nang hong muangte sia ngammuang takin na sungsiatna hong he uh hi.

²⁰Amate sia mihingte ii thasawmna pan le ngalte selnona panin nangma omna ngam muanna ah na seal hi.

²¹TOPA pok vun! Kei hong ki uumci a, hong kisim lai in, kei tungah itna hong lak sia bangza in lamdang ziam!

²²Ama omna panin kei hong hawlkeak zo vei bua na ziam ci in ka lau hi. Ahihang huna ngenin ka biapui ciangin ka auna hong za hi.

²³A thumaan ama ii mihing theampo awng TOPA it vun. TOPA in a thumaante hung hi, ahihang a kiphasakte ahile amate taw kiphu in daan pia hi.

²⁴TOPA sungah lametna a neite theampo awng, na tha uh khosak vun a, na thin uh hangsak vun.