Read Siyin Chin Psalm Late 32 Bible Online

Psalm Late 32 - Siyin Chin bible

Psalm Late 32

¹A mawna uh kimaisak a, a khialna uh a kipengsakte in mihing lungdamte ahi uh hi.

²TOPA ii ngamta khial hi ci a, maw a sot ngawlte le, theamna cite theampo taw a kipealte in mihing lungdamte ahi hi.

³Ka mawnate ka pualaak ngawl ciangin, sunkhuateak in ka kakaana taw ka zawm ngiingeei hi.

⁴TOPA awng, sun taw zan taw daan nong pia hi, khaal nisa ii tuikhu a kosak bangin ka thazawm dikdek hi.

⁵Tuasia ciangin nang tungah ka mawnate kong pualaak a, ka tatkhialnate ka seal bua hi. Tuate nang tungah pualaak tu in ka khensat hi, tuaciang nangma in ka mawnate theampo nong maisak hi.

⁶Tua ahikom a thumaan na mihingte in a taangsap hun sung nang tungah thu hong nget tu ahi hi; ngimna in namthuam lianpi bangin hong pai in hong nawkngawp ciang, amate a baan buatu hi.

⁷Nangma in ka bukna mun na hi a, ngim ngana panin nong hun tu hi. Nging takin, na ngupna thu, la in ka sa hi, banghang ziam cile nangma in kei nong sungsia hi.

⁸TOPA in, “Na pai natu lampi kong hil tu hi; keima in kong lak tu a, ngaisutna kong pia tu hi.

⁹A ki uk thei natu in kamkhau bul a kul siphu ahibuale laa bangin na mawmaw heak vun” ci hi.

¹⁰Mihing seksolte a thuak uh kul hi, ahihang TOPA a muangte sia ama ii itna kip in dal hi.

¹¹No thutangte awng, lungdam in lawp vun, TOPA sep sate hu in lungdam vun. Ama thu a nite awng, lungdam in au keak vun!