Read Siyin Chin Psalm Late 33 Bible Online

Psalm Late 33 - Siyin Chin bible

Psalm Late 33

¹No a thutangte awng, TOPA ii a sep sate hu in lungdamin au vun; ama thu a nite awng, ama pok vun.

²TOPA tungah lungdamkona in tengtonghte tumin, khau a kithua tumtheite tumin ama ii tungah lasa vun.

³Ama ii tungah lathak sa vun, thiamna taw tengtonghte tum vun a, lungdam in au vun.

⁴TOPA kammalte in maan hi, tuaciangin ama ii nasepnate theampo sia suan thamman hi.

⁵TOPA in a thutang le a maan dei a, ama ii itna kip leitung ah dim hi.

⁶TOPA in a thupiakna taw vantungte bitphua hi, ni, tha le aksite a kammal taw piangsak hi.

⁷Ama in tuipi theampo mun khat ah khawmtua a, tuipi thukte khakin a bitna sungah khol hi.

⁸Leitung theampo awng, TOPA bia vun! Leitung mihingte theampo awng, ama vaang pia vun!

⁹Ama a pau ciangin leitung kibitphua a, ama thupiakna taw na theampo piang hi.

¹⁰TOPA in minam tuatuamte ii tupnate nawngkaisak a, amate ii ngealnate a vawt suak zawk ngawl natu in khak hi.

¹¹Ahihang ama ngealnate in a tawntungin kip a, ama tupnate in a tawntungin kikhomsuan hi.

¹²Pathian sia TOPA in a neite, minam lungdamte hi uh a, Ama ii mi tu in a teal sate sia mihing lungdamte ahi uh hi.

¹³TOPA in vantung panin ensuk a mihing nam bup mu hi.

¹⁴Ama ukna mun panin leitung ah a teangte theampo ensuk hi.

¹⁵Amate khua ngaisut theina theampo sia ama ii piak hi a, amate sep le vawt theampo he hi.

¹⁶Kumpipa khat in ama ngalkaphon thahat hu in ngalzo hi ngawl a, ngalkap khat in ama thahatna hu in zawna mualsua hi ngawl hi.

¹⁷Ngal simna siphute sia ngalzaw natu in mannung ngawl a, amate ii a lian thahatna in hun thei ngawl hi.

¹⁸TOPA in ama thu a nite le ama ii itna kip a muangte encing hi.

¹⁹Ama in thina panin amate hun a, kialpi tun hun sungin nungtasak hi.

²⁰Eite in ih lametna sia TOPA sungah ih nga a, ama sia eite kidalna le hong hu pa ahi hi.

²¹Eite in ama hangin ih lungdam a, ama ii min thiangtho ih muang hi.

²²TOPA awng, Nang sungah lametna kong nei uh bangma in nong itna kip sia ko taw hong omkhawm tawntung tahen.