Read Siyin Chin Psalm Late 34 Bible Online

Psalm Late 34 - Siyin Chin bible

Psalm Late 34

¹TOPA tungah lungdam ka ko tawntung tu a, ama pokna ka tawlnga ngei buatu hi.

²Ama ii sepnate hangin ama ka pok tu a, a kizothaw theampo in ngai in lungdam tahen.

³keima taw kopin TOPA letna thangsak in, ama min pok khawm tek tawng.

⁴TOPA tungah thu ka ngen a, ama in hong zo hi; ama in ka launa theampo panin hong suaktasak hi.

⁵A kizothaw theampo in ama mitsuan uh a, lungdam uh hi; amate in a thinkiam ngeingawl tu hi.

⁶A cimawte in ama biakpui a, tuaciang ama in zo hi; amate ngimna theampo panin ama in hun hi.

⁷TOPA a zaktate sia a vantunglalang in cing a, launa sung panin suatak hi.

⁸TOPA sia bangza in pha ziam ci sia noma le noma in zong tavun. Ama sungah ngammuanna a ngate in mihing lungdamte ahi uh hi.

⁹Ama ii mi theampo awng, TOPA patoai vun; ama ii thu a nite in a kitaangsap theampo nga uh hi.

¹⁰Tawpite ngawngawn an neak tu samh in ngilkial thei a, ahihang TOPA thu a nite in na pha bangma a kisamh bua uh hi.

¹¹A khangmoi ka lawmte awng, hong pai tavun a, hong ngai tavun, Pathian patoai tu zia kong hil tu hi.

¹²A nuamin na nungta nuam uh ziam? Khansauna le lungdamna na dei uh ziam?

¹³Tua ahile kam ngilo pauna le leilot thusonnate pan kikeam vun.

¹⁴Ngitlonate nungngatin a pha vawt vun; na thin theampo uh taw kilemna a om natu in hanciam vun.

¹⁵TOPA in thutangte encing a, amate aunate ngai hi;

¹⁶ahihang siatna a vawtte sia ama in langpan a, tua in amate a thi uh ciangin a kimakngil pal natu ahi hi.

¹⁷Thutangte in TOPA biakpui uh a, ama in ngai hi; amate ngimna theampo panin suatak hi.

¹⁸TOPA in a thinkiam mihingte taw a kinai in om a, lametna a nei nawn ngawlte hun hi.

¹⁹Miphate in ngimna tam mama thuak a, ahihang TOPA in tuate theampo panin ama hun hi;

²⁰TOPA in ama pha takin keam a, a ngute khat zongh tal ngawl hi.

²¹Ngitlona in mihing seksolpa that tu a, thutangte a ensante in daan thuak tu hi.

²²TOPA in ama mite hun tu a, ama a bealhte kikhoaikhe tu hi.