Read Siyin Chin Psalm Late 37 Bible Online

Psalm Late 37 - Siyin Chin bible

Psalm Late 37

¹Mihing seksolte hangin thinngim heak vun; khialna a vawtte eang heak vun.

²Amate in lopa ko bangin bo pal tu hi; thingno vulte bangin thi tu hi.

³TOPA muangin ngamtat pha ngamta vun; tua leitang tungah teangin ngammuang tavun.

⁴Na lungdamna uh sia TOPA sungah zong vun, tuasia ciang ama in na lungngulna bang hong pia tu hi.

⁵Nangma le nangma TOPA tungah ki aap in; ama muang in, ama in nang hong hu tu hi;

⁶ama in na thutang sia sun ni bangin hong taangsak tu hi.

⁷Thinsau in TOPA sep tu ngak in; a nuamsate le a sia ngealna neite ii maa tutnate hangin thinngim heak vun.

⁸Thinngimna le thin uukna in na zosak heak vun, tuate in ngimna sung hong then bek hi.

⁹TOPA a muangte in ngam le lei a lua tu hi; ahihang a seksolte kinotkeak tu hi.

¹⁰Hai ngawlin a seksolte hong bo tu hi; na zawzon hangin na mu nawn buatu hi.

¹¹A kiniamkhiakte in ngam le lei lua tu a, nopsakna le thinnopna nga tu uh hi.

¹²Mihing seksolte in mihing phate thasawmin etsatna taw salh uh hi.

¹³Ahihang Topa in mihing seksolte nuisan lel hi, banghang ziam cile amate hai ngawlin kilalcipsak tu hi ci in he hi.

¹⁴A zawngte le a cimawte thatlum nuam a, a maan na a seamte thatlum nuamin, mihing seksolte in a namsau dokin a thal uh keak uh hi;

¹⁵ahihang amate le amate a namsau uh taw ma kithatlum tu uh a, tuaciang a thal uhte laltham tu hi.

¹⁶Mihing pha khat ii tawmno khat a nei teng sia mihing seksol theampo ii hauna sangin man neizaw hi,

¹⁷banghang ziam cile TOPA in a seksolte ii thahatna laaksak tu a, ahihang mihing phate sungsia tu hi.

¹⁸TOPA in ama ii thu a nite khoi a, a ngam le a lei sia a tawntungin amate atu hi tu hi.

¹⁹Hunsia hong tun ciangin, amate in thuak ngawl tu uh hi; kialpi tun hunin a khom tu uh an nei tu hi.

²⁰Ahihang mihing seksolte thi tu uh hi; TOPA ngalte sia ngamsung paakte bangin mangthang tu hi; amate meikhu bangin a bo tu uh hi.

²¹Mihing seksolte in leitoai in, lo kik ngeingawl a, ahihang mihing phate in ngo takin pia hi.

²²TOPA ii thupha a piakte in ngam le lei lua tu uh a, ama ii haamsiatna a thuakte ahile, kinotkeak tu hi.

²³TOPA in mihing khat sia a pai natu lak a, ama a lungkimsakte hung hi.

²⁴Amate sia a puk zongin a topcip buatu uh hi, banghang ziam cile TOPA in domto tu hi.

²⁵Tu in ka huai zo a, hun sau ma ka nungta zo hi. Ahihang mihing pha khat TOPA in nusia ahibuale a tate khutdaw an ngenin vaak ci thu ka mu ngei bualai hi.

²⁶Amate in midangte tungah ol takin pia in, pukthaak tawntung a, tuaciang a tate sia a thupha saanna khat ahi hi.

²⁷Ngitlona panin kiheak vun a, a pha vawt vun, tuasia ciang na suan na paalte in tua leitang tungah teang tawntung tu hi;

²⁸banghang ziam cile TOPA in a maan dei a, a thumaan a mihingte a nusia bua hi. Amate a tawntungin sungsia a, ahihang a seksolte ii suan le paalte sia kinotkeak tu hi.

²⁹Thutangte in ngam le lei lua in a sungah teang tawntung tu hi.

³⁰Miphate ii kammalte sia ciimkam hi a, thutang hi tawntung hi.

³¹Amate’ Pathian ii thukham sia a thinsung ah keam a, tua thukham panin a pial ngei bua hi.

³²Mihing pha khat sia mihing seksol khat in encik a thalup tu in hanciam hi;

³³Ahihang TOPA in a ngalpa khutsa sungah a nusia buatu a, ahibuale thu a kisit ciangin mawputsakna a thuak buatu hi.

³⁴TOPA tungah lametna nei vun a, a thupiakte ni vun; ngam le lei hong piakna taw ama in note hong patoai tu hi, tuaciang mihing seksolte a nawkeak na mu tu hi.

³⁵Khatvei lai in mihing seksol ahi ngual a zothaw ngawp thei khat ka he ngei hi; ama in Lebanon mualtung ah cedar thingkung khat bangin ngual tungtuangin om hi;

³⁶ahihang ka pai kik ciang a na om nawn bua hi; ama ka zon hang ka mu zo bua hi.

³⁷Mihing pha pa en vun a, thutang pa entel vun; kilemna a nei mihingte in suan le paal nei hi,

³⁸ahihang mimawte sia kilal cimitsak siat a, a suan a paalte sia kimon siat hi.

³⁹TOPA in mihing thutangte hun a, ngimna hun sungah amate sungsia hi.

⁴⁰TOPA in amate hu a suatak hi; ama in mihing ngilote khut sung panin hun hi, banghang ziam cile amate a dal tu in ama zuan uh hi.