Read Siyin Chin Psalm Late 39 Bible Online

Psalm Late 39 - Siyin Chin bible

Psalm Late 39

¹“Ka sep po kidawmin seam tong tuaciang ka leei zongh in mawna vawtsak bua tong; mihing ngilote hong nai laitakin bangma pau bua tong” ka ci hi.

²Ka thim om a, kam khat zongh ka huthe bua hi, a phate ngawngawn zongh ka son bua hi! Ahihang ka thuakna sia khang vaial bekin,

³ka thinngim cip hi. Ka ngaisut a tam vaial ciang, ka thinngim vaial a; hi bangin dongh ngawlin ka om thei bua hi:

⁴“TOPA awng, bang tanvei nungta tu khi ziam? Bang hun ciang thi tu khi ziam? Ka nuntakna bangza in bo pal tu ziam hong son ta'n.”

⁵Ka khan bangza in hong tomsak zo ni ziam! Nang muna ah kei ii khan khat sia bangma ngawl bang ahi hi. A tatakin a nungta mihing khat sia vui muut khat za hi bek a,

⁶limh khat bang hi lel hi. Ama sep le vawtte bangma in a kimang bua hi; ama in nei le lamh khawmtua ahitazong akua in lua tu ziam ci in a he bua hi.

⁷Tua ahile Topa awng, bang lamen thei tu khi ziam? Ka lametna in nangma sung ahi hi.

⁸Ka mawna theampo panin hong hun ta'n a, mihing mawmawte in hong nuisansak heak in.

⁹Thim takin ka om tu a, kam khat zongh ka huthe buatu hi, banghang ziam cile hi bang a, hong thuaksak sia nangma na hi hi.

¹⁰Daan hong pia nawn heak in! Nong vuakna taw ka thi dek zo hi.

¹¹Ko ii mawnate sia nangma ii teihna taw daan nong pia hi, tuaciang koma ii itte sia nget ii neak bangin na lalsak hi! A tatakin kote sia husan khat za kan ha hi bua uh hi!

¹²TOPA awng, kong thungetna hong za ta'n a, ka auna hong ngai ta'n; ka kaa ciangin kei hong hu tu in hong pai ta'n. Ka taanghpupite theampo bangma in keima in tawmvei no sung atu bekin na leangna ka hi hi.

¹³Ka thi ma thinnopna tawm ka nga thei natu in keima nguak hong omsak ta'n.