Read Siyin Chin Psalm Late 40 Bible Online

Psalm Late 40 - Siyin Chin bible

Psalm Late 40

¹TOPA huna nga tu in thinsau takin ka ngak hi; ama in hong ngai a ka auna hong za hi.

²Ama in a lauhuai dum sung le, thi theina sennawng sung panin hong kaito hi. Ama in suangpi tungah lau om ngawlin hong suanhto a ngam muanna hong pia hi.

³Ama in Pathian pokna la thak sak tu khat hong hil a, ih Pathian pokna la ahi hi. Hi thu teng a mu mi tam mamate in kidop theina nga tu a, TOPA tungah muanna nei tu uh hi.

⁴Milim sang zuan ngawlin ahibuale pathian maan ngawl a biate taw kop ngawlin, TOPA a muangte in mihing lungdamte ahi uh hi.

⁵TOPA kote Pathian awng, ko atu na tam mama nong sepsak zo hi; nang taw a kibang khat zongh om ngawl hi! Ko atu in a lamdang ngealnate tam mama nong vawtsak zo hi. Tuate tam lei ahikom a vekpi in ka son zo ngei buatu hi!

⁶Sangaw biakpiakna le piakkhiatnate na dei bua hi; biaknatau tungah nganhing pumhal tu nong ngen bua hi, tua ahibuale zong mawnate laak keak natu in sangaw biaknate nong ngen bua hi. Tuate taangin na aw ka zaak thei natu in bil nong pia hi,

⁷tuaciangin, keima in “Hi lai ah om khi hi; na thukham laibu sungah keima atu na thupiakte om nginge hi.

⁸Na deina bangin sep tu sia bangza in uuk khi ziam, ka Pathian awng! Nong hilnate ka thinsung ah ka keam hi,” ci in ka zo hi.

⁹TOPA awng, na mite theampo ii kikhopna sungah, kote nong ngupkhiat lungdamna thupha ka son hi. Tawp hun nei ngawlin ka son tu sia nong he hi.

¹⁰Ngupna thute sia keima aituam atu in bilh thong ngawl khi hi; na thumaanna le nong huna sia ka son tawntung zo hi. Na mite theampo kikhopna sungah na thumaanna le na itna kipte son ngawlin ka om bua hi.

¹¹TOPA awng, kei nong hesuakna sia tawp ngeingawl tu hi, ci in ka he hi. Nong itna le na thumaanna in kei hong keamcing tawntung tu hi.

¹²Sim zawk zongh ahi ngawl ngimna tam mama in kei hong kiim uum hi. Khuamu thei ngawl za dongin, ka mawnate in, kei hong khunel zo hi; amate ka samzam phaza sangin tamzaw a, ka thin kiamcip hi.

¹³TOPA awng, kei hong hun ta'n! Tu ma in hong hu ta'n!

¹⁴Kei thalup tu hong sawmte lelna le buaina thuak siat tahen. Kei ii ngimna hu a, a lungdamte sia nungkinin maizum thuak tahen.

¹⁵Kei hong selnote amate ii lelna hu in a thin lal tahen.

¹⁶Nang kung hong zuan theampo lungdam in thinnuam tahen. Nong ngupkhiatna tungtaang ah a lungdam theite theampo in, “Topa bangza lian ziam” ci tawntung tahen.

¹⁷Topa awng, kei sia thazawm in ka zawngkhal a, ahihang nong mangil bua hi. Nang sia ka hunpa le ka Pathian na hikom, hong hu memeang ta'n!