Read Siyin Chin Psalm Late 41 Bible Online

Psalm Late 41 - Siyin Chin bible

Psalm Late 41

¹Mizawngte a thinnuammawte sia mihing lungdamte ahi uh hi; amate ngim a nga uh ciangin TOPA in hu tu hi.

²TOPA in sungsia in a nuntakna uh kepsak tu hi; amate a ngam a lei sungah a lungdamsak tu hi; a ngalte khut sungah amate a nusiat buatu hi.

³A ci uh a nat ciang TOPA in hu tu a, ciidamna pia kik tu hi.

⁴“TOPA awng, nang tungah kong maw zo hi; hong hesuak ta'n a hong damsak ta'n” kong ci hi.

⁵Ka ngalte in kei huvau kam ngilo pau uh hi. Amate in kei sia thi leng a hong kimangil le oai uh hi.

⁶Kei hong ve tu a hong pai te zongh a thin takpi hi ngawl hi; kei huvau thusiate khawmtua a, tua zawkciang pai in mun theampo ah son uh hi.

⁷Hong ensan theampo in kei hong ngenin khat le khat kihuau uh a, kei taw kisai a siabel teng ngaisut in nei uh hi.

⁸Amate in, “Ama sia thi tu in a na hi zo hi; a lupmuntung ngak top tu hi” ci uh hi.

⁹Ka lawm phabel, ka muanbel, ka ankuang uumpui sia ngawngawn in kei hong langpan hi.

¹⁰TOPA awng, hong hesuak ta'n a, ciidamna hong pia kik ta'n, tuasia ciang ka ngalte ka thuk kik tu hi.

¹¹Amate in kei hong zo ngawl tu a, tuaciang nong lungkimpui hunlam ka he tu hi.

¹²Nangma in kei nong hu tu hi, banghang ziam cile a maan sia ka seam hi; na omna munah kei nong keam tawntung tu hi.

¹³Israel te ii Pathian TOPA pok vun! Tu le a tawntungin pok vun! Amen! Amen!