Read Siyin Chin Psalm Late 44 Bible Online

Psalm Late 44 - Siyin Chin bible

Psalm Late 44

¹Pathian awng, ngei tawngh lai in na sep na vawtte ka taanghpupite in hong son zo a, ka bil uh taw ka za zo uh hi:

²Nangma mama in Pathian he ngawlte bangbang na notkeak a, amate ii leitang tungah na mite bangbang na koi a; minam dangte bangbang daan pia in, na mite bangbang khangtosak ci thu ka za uh hi.

³Na mite in tua leitang sia amate ii a namsau taw zothal hi ngawl hi; amate vaangletna taw a zothal hi ngawl hi; nangma vaangletna le thahatna taw ahizong, nangma ompuina taw ahizong a zo hi a, tua in amate na itna na lakna ahi hi.

⁴Nangma in ka kumpipa le ka Pathian na hi hi; na mite tungah zawna na pia a,

⁵tuaciangin nangma vaangletna taw ngalte ka zo uh hi.

⁶Kei hong hun tu in ka thal ahibuale ka namsau ka muang bua hi;

⁷ahihang nangma in ka ngalte khut sung panin nong hun zo a, hong ensante na zo zo hi.

⁸Nang kong pok tawntung tu a, a tawntungin lungdam kong ko tu uh hi.

⁹Ahihang tu laitakin nong nial a, lelna nong thuaksak hi; ka ngalkap honte nong tonpui nawn bua hi.

¹⁰Koma ngalte kung panin nong taisak a, ko neisate amate atu in la uh hi.

¹¹Tuute bangin nong kingolumsak hi; ngamdang ah nong thethaang hi.

¹²Bangma man a nei lei ngawlte bang phetin na mite takpi man tawmno taw nong zuak zo hi.

¹³Ka innpaamte in ko tungah nong ngamtatna teng hong mu a, amate in ko hong selno in hong nuisan uh hi.

¹⁴Minam tuatuamte sungah ko sia ngual zawnsak tu in nong koi hi; amate in a lu uh hong thin in hong nunau uh hi.

¹⁵Kei sia a tawntungin minsiat ka thuak hi; maizumna in hong khunel hi,

¹⁶ka ngalte le hong ensante ii hong nunauna le hong selnona ka zaak ciangin ka mai zumna in hong khulum hi.

¹⁷Nang hong mangil ngawl ahibuale ko taw na vawt thuciamna paltan ngawl hi napi, hi bangte ko tungah hong piang siat zo hi.

¹⁸Nang tungah thumaan ngawlin ka om ngei bua uh hi; nong thupiakte kong nial bua uh hi.

¹⁹Tua hi napi ngamsate kawm ah a cimaw in nong nusia hi; a thukbel khuazing sungah nong nusia hi.

²⁰Ka Pathian kong biakna tawlnga hi le ung a, ngamdangte pathian tungah thungen hi le ung,

²¹hong mu tatak zo tu ni hi, banghang ziam cile ka ngaisut kute dongin nong he siat hi.

²²Ahihang nang hu in kote thalupna ka thuak tawntung uh a, ngawlup tu tuute bangin hong kivawt hi.

²³Topa awng, hong khanglo ta'n! Banghangin mu ni ziam? Nangma le nangma hong thoto ta'n! A tawntungin ko hong nial heak in!

²⁴Banghangin ko kung panin buu ni ziam? Ka thuakna uh le ka ngimnate hong makngilsak heak in!

²⁵Lei ah pukin ka topcip zo uh hi; leivui sungah lelna taw ka liik zo uh hi.

²⁶Ko hong hu tu in hong pai ta'n! Nong itna kip hangin hong hun ta'n!