Read Siyin Chin Psalm Late 45 Bible Online

Psalm Late 45 - Siyin Chin bible

Psalm Late 45

¹Kumpipa atu hi la ka phua laitakin ka khua ngaisutna in kammal hoi nawno taw kidim hi. Lai at thiampa laikung bangin ka leei sia lamal phuak tu in kinging hi.

²Nangma in pasal a minpiang a mealphabel na hi hi; kampau thiam pa na hi hi. Pathian in nangma thupha hong pia tawntung hi.

³Vaanglian Kumpipa awng; na namsau hong kua tan nangma in minthang in uk zawkna vaang nei ni hi.

⁴Thumaan le thutang khenna a huu tu in zawna sungah na uk theina vaang taw hong pai ta'n. Na thahatna in zawna lianpite hong ngasak tu hi.

⁵Na thaltangte hiam a, na ngalte lungtangte vutlet hi; minam tuatuamte in na peang ah puksuk hi.

⁶Pathian ii hong piak kumpi ngam sia a tawntung a tawntungin kikhomsuan tu hi. Na mite thukhaikim taw na uk hi;

⁷a maan na dei a, a siate na ensan hi. Tua hu in nangma ii Pathian in nang hong teal zo a, kumpi dang khat po sangin na tungah lungdamna a tamzaw hong buak zo hi.

⁸Myrrh le aloe a namtuite thau, na puan tungah nam hi; saiha taw a kizeam kumpi inn sungah music thiamte in nang hong lungdamsak hi.

⁹Na suumsung sang a om numeite sia kumpite tanute veu hi a, tuaciang na kumpi tokhum ziatsang ah kumpinu dingin, ama in khamh phabel taw a kivawt kizepnate taw kizeam hi.

¹⁰Kumpipa zi tu monu awng, kong thuson sia ngai in, na mite le na beete mangil in.

¹¹Na mealphatna hangin kumpipa in hong dei tu hi; ama in na topa ahikom ama thu na ni tu hi.

¹²Tyre mihingte in nang atu letsong hong paipui tu hi; sumhaute in maipha na piak tu hong hanciam tu hi.

¹³Kumpipa tanu kumpi inn sungah om hi — ama bangza in a mealpha ziam! A puantual sia khamh khau taw kitak hi.

¹⁴Mealcii tuatuam a nei puantual pawl silhin kumpipa kungah ama kipaipui a, ama a zui moliate zongh kumpipa kungah a vekpi in kipaipui hi.

¹⁵Lungdamna le thinnopna taw amate hong pai a kumpipa inn sungah hong tum uh hi.

¹⁶Nang ka kumpipa in, na taanghpupite kumpiza a laih tu tapa tam mama na nei tu hi. Tuaciang amate sia leitung bup a ukte na suaksak tu hi.

¹⁷Ka laphua in na minthanna sia a tawntungin nungtasak tu a, mihing theampo in hong pai lai tu hun theampo sungah nang hong pok tu hi.