Read Siyin Chin Psalm Late 49 Bible Online

Psalm Late 49 - Siyin Chin bible

Psalm Late 49

¹A kuama po in hi thu za vun! Mun theampo a om mihingte awng,

²A lian, a no, a hau, a zawng a kibangin ngai khawm tek vun.

³Ka ngaisutte kitelthiang tu hi; ciimna kammalte ka pau tu hi.

⁴Paunakte kong zangh tu a tengtongh ka tum ciang a khiakna kong sontel tu hi.

⁵Ka ngalte in hong kiim uum a, launa hun sungah ka om ciang ka lau bua hi.

⁶A hauna uh muangin a neisate uh a kiphatsakpui mihing ngilote in hong kiim uum hangin ka kiita buatu hi.

⁷Mihing khat in ama le ama kitan thei ngeingawl hi; a nuntakna ii man Pathian tungah lo zo ngeingawl hi,

⁸banghang ziam cile mihing khat ii nuntakna ii a man sia tam leih hi.

⁹Thaankuul a thet ngawl natu le tawntung nuntak natu in ama ii piak thei tute a kicing ngei buatu hi.

¹⁰Mihing mawmawte le a nanghte bangma in mihing a ciimte zongh thi hi ci in a kuama theampo ii mu thei ahi hi. Amate theampo in a hauna uh sia a suan a paalte nusiat hi.

¹¹Amate in leitangte nei ngei ahihang Amate ii thaankuulte sia a tawntungin a inn uh hi a; tua munah a tawntungin teang uh hi.

¹²Mihing khat ii letna in thina panin ama hun thei ngeingawl hi; ama sia nganhingte bangin thi veve tu hi.

¹³A hauna uh taw a lungkimte ii tawpna le amate le amate a kimuangte bang tawk ziam ci sia en vun —

¹⁴amate sia tuute bangin a thi tu in kisee a, Thina sia amate tuucing pa a hi tu hi. Amate pumpi sia manlang takin muatin amate ii inn taw a kikhuala mithi khua ah a om uh ciang thutangte in amate tungah zawna mualsua tu hi.

¹⁵Ahihang Pathian in kei hong suatak tu hi; thina vaangletna panin kei hong hun tu hi.

¹⁶Mihing khat a hau ciang le ama haunate a khan seseam ciang zongin na thinnuammaw heak vun;

¹⁷ama in a thi ciangin keng thei tuan ngawl hi; a hauna sia ama in thaan ah tonpui thei ngawl hi.

¹⁸Mihing khat in hi nuntakna sungah lungkim in ama zawnate hu in kipok kale,

¹⁹ama in thi in a tawntung khua zingna mun a taanghpupite kung zuan tu hi.

²⁰Mihing khat ii letna in thina panin ama hun zo ngeingawl hi; ama sia nganhingte bangin thi lai tu hi.