Read Siyin Chin Psalm Late 5 Bible Online

Psalm Late 5 - Siyin Chin bible

Psalm Late 5

¹Ka kammalte hong ngai ta'n a ka huuisaknate hong za ta'n, TOPA awng

²Hu ngenin ka auna aw hong ngai ta'n, ka Pathian le ka kumpipa awng! TOPA awng, na tungah thu kong ngen hi,

³zingsangin ka aw nong za hi; ni sua ciang kong ngetnate na mai ah kong lui a, nong zo tu kong ngak hi.

⁴Banghang ziam cile nang sia tatsiatna a dei Pathian na hi bua hi; nang omna munah ngitlonate na oai bua hi.

⁵A kiphasakte sia na mai ah a ding thei buatu hi; mihing seksol theampo na ensan hi.

⁶Nangma in leilot thusonte na susia a, a ngoltolte le ngual theamte na thusim bua hi.

⁷Ahihang kei sia nong itna lian ahikom na inn sungah kong tum thei hi, na Biakinnpi thiangtho sang nga in nangma thasiana taw kong bia tu hi.

⁸TOPA awng, ngal ka hau lawlawm hi! na deina bang a vawt tu in lam hong pui ta'n; ka zui tu in na lampi tamkimsak in.

⁹Ka ngalte ii kampaute kimuang thei ngeingawl hi, amate in lalcipsak tu bek uuk hi. Amate kampau te sia kisial pokna hi a, zaak nop huai hi, ahihang, thina hong then thei kitheamna taw kidim hi.

¹⁰Pathian awng, amate puavawk in daan pia in: amate ii thimtham tupna taw amate puk tahen; a khialna tam mamate le nang hong leedo hu in na kung pan amate notkeak in.

¹¹Ahihang nangma hong bealte theampo lungdam tahen. Amate in lungdamna taw lasa thei tawntung tahen. Nang hong itte na dal in, nang hu in amate lungdam takpi hi.

¹²Nang thu hong nite thupha na pia hi, TOPA awng; nangma itna in amate lum bangin sung hi.