Read Siyin Chin Psalm Late 51 Bible Online

Psalm Late 51 - Siyin Chin bible

Psalm Late 51

¹ Pathian awng, nong itna kip hu in kei hong hesuak ta'n, A lian na hesuakna hu in ka mawnate hong melsak ta'n!

²Ka ngitlona theampo hong silsak ta'n a, ka mawna panin hong thiangthosak ta'n!

³Ka tatkhialnate ka he a, ka mawnate ka phawk tawntung hi.

⁴Nangma tung tatak ah hong maw zo khi hi, sia na sakte ka vawt zo hi. Tua ahiciangin, thu nong khenna sia maan hi; kei nong mawsak sia khial ngawl ni hi.

⁵Ka pian ni pan ma in a sia ka hi hi; ka nu ngil sungah ka om lai pan ma in mimaw ka hi zo hi.

⁶Citakna le thumaanna sia na dei thu ahi hi; ka khua ngaisutna sia na ciimna taw hong dim ta'n.

⁷Ka mawna hong laakkeaksak ta'n, tua hile ka thiangtho tu hi, hong sil ta'n, tua hile vuuk sang ka ngo zaw tu hi.

⁸Thinnopna le lungdamna awte hong zasak ta'n; na delpeak, na sukthap sa ka hi tazong khatvei ma ka lungdam kik tu hi.

⁹Ka mawnate hong etsak heak in a, ka siatnate theampo hong melmaisak ta'n.

¹⁰Pathian awng, ka sungah thin thiangtho hong bitphua ta'n a, a thak le a thumaan thaa hong nguan ta'n.

¹¹Na omna mun panin hong beng heak in; ka tung panin na thaa thiangtho lakeak heak in.

¹²Na ngupna tungtawn a hong pai lungdamna sia hong pia kik ta'n a, na thu a ni nuam tu in hong siam ta'n.

¹³Tuasia ciangin mimawte sia nangma thupiakte ka hil tu a, amate in nang hong zuan kik tu uh hi.

¹⁴Pathian awng, ka nuntakna hong khoaikhe ta'n a, hong hun ta'n, tuaciang thutang na hina lungdam takin ka thangsak tu hi.

¹⁵Topa awng, ka pau thei natu in hong hu ta'n, tuaciang nangma kong pok tu hi.

¹⁶Sangaw biakpiaknate na dei bua hi, tua hi buale tuate kong pia zo tu hi; meihal biakpiaknate taw na lung a kim zo bua hi.

¹⁷Pathian dei sangaw biakpiakna sia a kiniamkhiak thinsung ahi hi; Pathian awng, a kiniamkhiak le a kisiik kik thinsung na nial bua hi.

¹⁸Pathian awng, Zion tungah thuthiam in na hu in; Jerusalem luphungte na ciangto kik in.

¹⁹Tuasia ciang a kilawm sangaw biakpiaknate le koma ii meihal biakpiaknate dik na sa tu hi; tuaciang na biaknatau tungah khuitalte biakpiakna in hong kipia tu hi.