Read Siyin Chin Psalm Late 52 Bible Online

Psalm Late 52 - Siyin Chin bible

Psalm Late 52

¹Milian pa awng banghangin na siatna kiphatsak pui ni ziam? Pathian thumaanna sia a tawntungin kip hi.

²Ngualdangte lal natu in na ngeal uh hi; na leei sia mulnam hiam khat taw kibang a, leilot thu na phuaktawm tawntung uh hi.

³Siatna sia phatna sangin na lamnai zaw uh a, thumaan sangin a maan ngawl thu na deizaw uh hi.

⁴Nang a leilot thei sia awng, na kammalte taw mite natsak tu na lamnai hi.

⁵Tua ahikom Pathian in nang sia hong lalcipsak top tu hi; ama in nang hong man tu a, na inn panin hong tua tu hi; a nungtate omna leitung panin nang hong khiin tu hi.

⁶A thutangte in hisia mu tu a, amate lauthawng tu uh hi; tuaciang amate in nang hong nuisan tu a,

⁷“En vun, ngammuan natu Pathian a suang ngawl, hi sungah mihing khat om a, ama in a nei a lamh tampite suang a, seksol ngamtatna taw ngammuanna zon a sawm zaw hi,” hong ci tu uh hi.

⁸Ahihang kei ka hile Pathian inn sungah a po olive thingkung bang ka hi hi; ama ii hong itna kip sia a tawntung, a tawntungin ka muang hi.

⁹Pathian awng, na sepsa nate hu in lungdam kong ko tawntung tu hi; na mite omna munah nang sia a pha na hi hunlam ka thangsak tu hi.