Read Siyin Chin Psalm Late 55 Bible Online

Psalm Late 55 - Siyin Chin bible

Psalm Late 55

¹Pathian awng, ka thungetna hong za ta'n; kong thuumna panin hong nungngat heak in!

²Hong ngai ta'n a hong zo ta'n; ka thinngimna taw zawmcip zo khi hi.

³Ka ngalte hong tawnna hu in ka lau a, mihing seksolte hong zawthawkna hangin ka topcip zo hi. Amate in ka tungah ngimna hong puak hi; amate kei tungah hong thin uukin hong ensan hi.

⁴Ka lau mama a, thi tu launa in hong nengcip hi.

⁵Liinna le launa in kei hong lencip hi; patauna in kei hong zo hi.

⁶Vakhu bangin tha nei leng ka uuk hi. Leangin tawlngakna ka mu tu hi.

⁷A khualana ah ka leang tu a, duisung ah ka teang tu hi.

⁸A thin uuk vuipi suangvalte panin bukna khat manlang takin ka mu tu hi.

⁹Topa awng, ka ngalte kampau uh hi bialbualsak in. Khuapi sungah, ngoltolna le buainate ka mu hi.

¹⁰Sun taw zan taw tua khuapi kiim uum uh a, tua khuapi sia khut khialna le ngimna taw kidimsak uh hi.

¹¹Mun theampo ah lalna om hi; lampite sia zawthawkna le kitheamna taw kidim hi.

¹²Kei hong nunau sia ka ngal khat hile thuak zo tu khi hi; kei hong langpan khat ii ka tungah hong kiphatsakna hile ama kung panin ka buu thei tu hi.

¹³Ahihang tuasia in ka kitholpui, ka pawl, ka lawm cii pha ahi nangma hi thong ni hi.

¹⁴Khat le khat sia thu ih kumkhawm a, Biakinnpi sungah ih bia khawm hi.

¹⁵Ka ngalte sia amate hun a cin ma in thi tahen; mithi khua ah amate a hingtang in zuansuk tahen! Siatna sia a inn sung le a thinsung uh ah om hi.

¹⁶Ahihang hong hu tu in TOPA Pathian ka sam a, tuaciang ama in kei hong hun tu hi.

¹⁷Zingsang, sun le zan in ka thuumnate le ka taunate ama kungah paito a, tua ahikom ama in ka aw hong za tu hi.

¹⁸Ngal tazata ka simnate pan ama in kei bit takin hong ciapui kik tu hi.

¹⁹Tawntung hun pan a, hong uk Pathian in kei hong za tu a, amate a zo tu hi; banghang ziam cile amate kikheal nuam ngawlin, ama a kiita bua uh hi.

²⁰Tu ma sia a, ka kitholpui pa in a lawmte sim hi; a kamciamte a peal hi.

²¹A kammal ahile noaidiat sangin neal zaw ahihang, a thinsung ah etsatna om hi; a kammalte sia sathau bangin neal a, ahihang tuate in namsau hiamte bangin bantan hi.

²²Na ngimna uh te TOPA nusiat vun, tua hile ama in hong hung tu hi; ama in mihing thumaante bangma hunin lelna thuaksak ngeingawl hi.

²³Ahihang, Pathian awng, mihing thatte le a leilotte nangma in amate khanlang a cin ma in a thaankuulte ah na paipui tu hi. Kei ka hile nang kong muang tu hi.