Read Siyin Chin Psalm Late 56 Bible Online

Psalm Late 56 - Siyin Chin bible

Psalm Late 56

¹Pathian awng, Kei hong hesuak ta'n, banghang ziam cile kei hong kisim hi; ka ngalte in a tawntungin kei hong vawtsia hi.

²Kei hong langpante in nitangtumin kei hong sim hi. Kei hong simte tam mama hi.

³Vaanglianbelpa TOPA awng ka lau ciang, ka muanna nang sungah kong nga hi.

⁴Pathian ka muang a, ka lau bua hi; ama ii hong kamciam hu in ama ka pok hi. Mihing lelel khat in kei bang hong law thei tu ziam?

⁵Ka ngalte in nitangtumin ngim hong pia hi; kei hong liamsua natu in amate in ngeal tawntung hi!

⁶Amate in a buliana munte ah kikhawm in, hong thatlum thei tu in ki um uh a, ka ngamtatna theampo hong encik hi.

⁷Pathian awng, amate ngitlona hu in amate daan pia in; na thin uukna taw tua mite zothal in.

⁸Bangza in ngim nga ka hi sia nong he hi; nangma in ka thituite nong tepteesak zo hi. Na laibu sungah tuate kiciamtee hi ka na ngawl ziam?

⁹Nang kong sam ni in ka ngalte kiheak kiksak tu hi. Hi thu ka he hi: Pathian sia keima sangah hong pang —

¹⁰a kamciamte ka pok TOPA ahi hi.

¹¹Ama ka muang a, ka lau buatu hi. Mihing lelel khat in kei bang hong law thei tu ziam?

¹²Pathian awng, kong kamciamsa sia kong pia tu hi; lungdamko piakkhiatna kong pia tu hi,

¹³banghang ziam cile nangma in thina panin nong suatak a, lelna panin nong keam hi. Tua ahikom Pathian ii mai, a nungtate tungah a taang khuavak sia sungah ka vak hi.