Read Siyin Chin Psalm Late 57 Bible Online

Psalm Late 57 - Siyin Chin bible

Psalm Late 57

¹ Kei hong hesuak ta'n, Pathian awng, kei hong hesuak ta'n, banghang ziam cile ngammuanna nga natu in nang kong zuan hi. A nasia mama vuipi suangvalte a thim dong na thakhui ii limh nuai ah kidalna ka nga hi.

²Saangbel Pathian, ka kisapna theampo hong pia Pathian ka biakpui hi.

³Ama in vantung panin hong zo tu a hong hun tu hi; kei hong zothawte ama in zothal tu hi. Pathian in a itna kip le a thumaanna kei hong lak tu hi.

⁴Ngalte in kei hong kiim uum a, amate sia mihing sa a du tawpite bang ahi uh hi. Amate ii hatangte sia tei bang thaltang bang ahi uh hi; amate ii leeite sia a hiam namsau bang ahi uh hi.

⁵Van ah na letna lak in Pathian awng, leitung theampo ah na minthanna lak in.

⁶Ka ngalte in kei hong mat natu in ngeen khat phalh hi; thinngimna taw ka kidim hi. Amate in ka lampi ah vuum khat to uh a, ahihang amate ma tua ii sungah taaksuk uh hi.

⁷Pathian awng, muanna kicing ka nei hi; la ka sa tu a, nang kong pok tu hi!

⁸Ka thaa awng, khanglo in! Ka tengtongh le ka liamlo awng, hong khanglo tavun. Tung sunni ka phong tu hi.

⁹Topa awng, minam tuatuamte sungah, lungdam kong ko tu hi. mihingte sungah nang kong pok tu hi.

¹⁰Na itna kip in vantungte ban hi; na thumaanna in van dong pha hi.

¹¹Na letna van ah lak in, Pathian awng, na minthanna leitung theampo ah lak in.