Read Siyin Chin Psalm Late 60 Bible Online

Psalm Late 60 - Siyin Chin bible

Psalm Late 60

¹ Nangma in kote nong nial zo a, Pathian awng, nong zothal zo hi. Ko tungah na thin uuk zo hi — ahihang tu in kote hong maingat kik ta'n.

²Leitangte nangma in na liingsak a na kekthamsak hi; tu in a keknate kimatsak kik in banghang ziam cile cimhtham tu in kithoai hi.

³Na mite nasia takin nong thuaksak hi; zukham bang keakin ka hoi uh hi.

⁴Nang hong thasiate tungah kidop natu thu na pia zo a, tua taw amate in lalna tu pan suakta thei tu uh hi.

⁵Na thahatna taw kote hong hun ta'n; na it, na mite a suatak natu in ko thungetna hong zo ta'n.

⁶Ama ii a thiangtho mun panin Pathian in, “Zawna mualsuana taw Shechem ka khentham tu a, Sukkoth Ngamkuam sia ka mite ka hawmsak tu hi.

⁷Gilead sia keima aa hi a, Manasseh zongh keima aa ahi hi. Ephraim sia ka thik lukhu hi a, Judah sia ka kumpi ciangkhut hi.

⁸Ahihang Moab sia kisilna kuangin ka zangh tu a, keima neisa ahi hunlam a kitel natu in ka peangdap taw Edom ka deang tu hi. Philistine te in kei tungah zawna mualsua in au tu ki um ziam?” ci hi.

⁹Pathian awng, luphung taw a ki uum khuapi sungah akua in kei hong paipui tu ziam? Edom ah akua in kei lam hong pui tu ziam?

¹⁰Kote hong nial takpi zo ni ziam? Ka ngalkap honte taw hong mainawt pui ngawl tu ni ziam?

¹¹Ngal hong dopui ta'n; mihingte hong huna sia mannung ngawl hi.

¹²Pathian ei sangah hong pang pole ih zo tu hi; ama in ih ngalte zo tu hi.