Read Siyin Chin Psalm Late 65 Bible Online

Psalm Late 65 - Siyin Chin bible

Psalm Late 65

¹Pathian awng, Zion khua sungah nang kong pok tu uh le nang tungah ka kamciamna uh ka kholet tu uh sia a maan ahi hi,

²banghang ziam cile nangma in thungetnate na zo hi. Mun theampo panin mihingte in

³amate mawnate hangin nang hong zuan tu uh hi. Koma khialnate in hong zo hi, ahihang nangma in tuate na maisak hi.

⁴Na inn thiangtho sungah teang tu in na paipui, na teal sate mi nuamsate ahi uh hi. Na inn sungah na phate, na Biakinnpi thiangtho ii thuphate hangin ka lung uh kim tu hi.

⁵Zawna nong piakna taw kote ngetna nong zo a, ko nong ngup natu in nalamdangte na vawt hi. Leitung bup mihingte le a khuala tuipi ngal khat ah a omte in nang hong muang hi.

⁶Na vaangletna lian lakin, nangma in mualte na thahatna taw a om natu munah na koi hi.

⁷Nangma in tuipite hawkna le tui kihual ngingte na thimsak hi; nangma in mihingte ii ngamlumna na thimsak hi.

⁸Leitung bup in na sepsa na liante lamdang sa in om uh hi. Na nasepnate in lungdam aunate leimong khat pan leimong khat dong thengsak hi.

⁹Leitang na thinbotna na lakna in nguatui na puak a; leipha leihoi in na vawt hi. Luamte tui taw na dimsak hi; leitung ah an na piangsak hi. Na sepzia in hi bang ahi hi:

¹⁰a kitho sa lote tungah nguatui a kicing piikpeak in na zusak a, lei na zenhsak hi; nangma in leitangte sia nguatui taw na nipsak a, thingno ankungte na khangsak hi.

¹¹Na phatna in bangza in an hauna piangsak ziam! Na paina theampo ah na a kicing takin om hi.

¹²Nganthana munte sia nganhon taw kidim hi; muallimveite sia lungdamna taw kidim hi;

¹³Lote sia tuu taw kidim a; ngamkuamte sia zungtaang taw kidim hi. Na theampo lungdamna taw au in lasa uh hi.