Read Siyin Chin Psalm Late 66 Bible Online

Psalm Late 66 - Siyin Chin bible

Psalm Late 66

¹Mihing theampo awng, lungdamin auna taw Pathian pok vun!

²Ama ii minthanna la in sa vun a, a minthang pokna ama pia vun!

³Pathian mun ah, “Na sep na vawtte bangza in lamdang ziam! Na vaangletna in lian lawlawm a, na ngalte in kiitakna taw na mai ah kun uh hi.

⁴Leitung mihing theampo in nangma hong bia uh hi; amate in pokna la hong sak uh a, amate in na min pokna la nang hong sak uh hi” ci vun.

⁵Hong pai tavun a, Pathian sepna sate, mihingte atu a lamdang a septe hong en tavun.

⁶Ama in tuipi sia leiko suaksak hi; ih taanghpupite in a peang uh taw ngun kaantan hi. Tua munah eite in ama ii sepna hu in ih lawp hi.

⁷Ama in a thahatna taw a tawntungin uk a, minam tuatuamte mitsuan hi. Ama langpanin kuama in tualngal tho heak hen.

⁸Minam theampo awng, ih Pathian pok vun; na pokna uh kiza tahen.

⁹Ama in eite a nungta in hong keam a, ih liik tu a oai bua hi.

¹⁰Pathian awng, kote hong sit zo ni hi; ngunn sia meisa taw a kithiansak bangin kote nong sittel zo hi.

¹¹Thaang sungah nong awksak a, ka nungzaang uh ah vanhngit nong suan hi.

¹²Ka ngalte in nong tuanhcilsak hi; meikuang le namthuam kaantanin ka pai uh hi, ahihang tu in nangma in ngammuanna mun khat nong then hi.

¹³Na inn ah meihal biakpiakna kong paipui tu hi; kong kamciam sia kong pia tu hi.

¹⁴Ngim ka nga hun lai kong pia tu hi ci in kong kamciam teng kong pia tu hi.

¹⁵Biaknatau tungah hal tu in tuute ka pia tu hi; khuitalte le kealte sangaw biakpiakna in ka nei tu a, a meikhu in van ah kaato tu hi.

¹⁶Pathian a patoaite theampo awng, hong pai tavun a ngai vun, tuasia ciang kei atu ama sep theampo kong son tu hi.

¹⁷Hu ngenin ama ka biakpui hi; late taw ama ka pok hi.

¹⁸Ka mawnate awlmawk ngawl hi leng Topa in kei hong nangai ngawl tu hi.

¹⁹Ahihang Pathian in kei hong za takpi zo hi; ka thungetna hong ngai zo hi.

²⁰Pathian ka pok hi, banghang ziam cile ama in ka thungetna hong nial ngawl a, hong itna kip sia kei kung panin la kik ngawl hi.